Хайи чIал, адетар рикIелай алудзавач

Мукьвара заз Краснодарский крайдин Новороссийск шегьерда авай чи ватанэгьлийри СтIал Сулейманан 150 йисан юбилейдиз талукь мярекат тухвайдакай, ина ЧIулав гьуьлуьн къерехра авай лезгийри жемиятдин тешкилат арадал гъанвайдакай хабар хьана. Къенин зи ихтилатни и крарин кьиле акъвазнавай Малик  Мейведдинович   Дамировакай  я. 

Ам 1959-йисан 26-ноябрдиз КцIар райондин Хьилерин хуьре дидедиз хьана. 1977-йисуз КцIар шегьерда интернат-мектеб куьтягьна. Малик гъвечIи чIавалай боксдал, кьуршахар кьунал, кьезил атлетикадал маш­гъул хьана. Ада вичин гележегни спортдихъ галаз алакъалу авуна: мектеб куьтягьай ам Бакудин институтдин физкультурадин факультетдик экечIна. 1978-йисуз адаз Советрин Армиядин жергейриз эверна. Псковский областда буржи чешнелудаказ кьилиз акъудиз эгечIай ам ротадин старшинавиле тайинарна. Частунин командованидин патай ада еке гьуьрмет къазанмишна. Аскервилин къуллугъ тамамарайдалай кьулухъ частунин командованиди Маликаз Пермдин  Советрин Союздин Маршал В.И.Чуйкован тIварунихъ галай военно-командный инженерный училищедик экечIун теклифна. 1980-йисуз ам и учи­лищедик экечIна. Ина кIелдай вахтундани ам курсунин старшинавиле тайинарна. Малик Дамирова училищедин спортдин ва жемиятдин мярекатра активнидаказ иштиракиз хьана. Адакай са шумуд сеферда спортдин жуьрейрай СССР-дин РВСН-дин  кьушунрин чемпион, грекринни римлуйрин жуьреда кьур­шахар кьунай мастервиле кандидат хьана.

1985-йисуз военный училище тафаватлудаказ куьтягьайдалай кьулухъ ада Киевдин военный округда офицер яз къуллугъна. Гуьгъуьнлай СССР-дин ва РФ-дин оборонадин министерстводин кьилин управленида къуллугъ давамарна, гьа са  вахтунда часть физический рекьяй гьазурунин начальникдин везифаярни тамамарна.

1986-йисуз хайи ерийрал хтана, эвленмиш хьана. Хизанда са руш тер­бияламишна. Дидени буба 2 хтулдини шадарзава.

1994-йисуз Петропавловск-Камчатский шегьердай Новороссийскдиз куьч хьана, къуллугъ ина давамарна. 2000-йисуз Малик Дамиров РФ-дин Яракьлу къуватрин жергейрай экъечIна. Запасда авай полковник, военный къуллугъдин ветеран хсуси карчивилел машгъул хьана.

Малик Мейведдиновича Новороссийск шегьердин Кьиблепатан райондин жемиятдин уьмуьрда активнидаказ иштиракзава. Ватанэгьлиди мергьяматлувилин крарни кьилиз акъудзава, яшайишдин четинвилера гьатай лезгийриз алакьдай куьмекар гузва.

Малик Дамиров кьиле аваз лезгийри алай йисан 18-майдиз Новороссийскдин СтIал Сулейманан тIва­рунихъ галай куьчеда шаирдин 150 йисан юбилейдиз талукьарнавай гегьенш мярекат тешкиллувилелди кьиле тухвана.  “Ана Краснодардин лезгийрин жемиятдин тешкилатдин председателдин заместитель Неж­муддин Муртузаев кьиле авай делегациядини иштиракна”, — лугьузва Малик Дамирова.

СтIал Сулейманаз талукь мярекат «Минута славы» конкурсдин финалист, лезгийрин машгьур симинин пагьливан Эдуард Мустафаевани вичин гьунарралди итижлуди авуна. Аник Новороссийскда яшамиш жезвай ватанпересрини чпин пай кутуна: Марат Гьажиева, Жафар Мансурова, Эльмудин Асланова, Тофик Шафиева, Камил Аббасова…

Къейдна кIанда хьи, эхиримжи вахтара гзаф лезгияр яшамиш жезвай жуьреба-жуьре шегьерра абуру милли тешкилатар арадал гъизва. ИкI, Малик Дамиров кьиле аваз, Новороссийскдани майдин вацралай ЧIулав гьуьлуьн зонадин лезгийрин жемиятдин тешкилат арадал атанва. Адан макьсад милливал хуьнин, хайи чIал, адетар, меденият еримлу авунин месэлаяр гьялун я. Вири крара агалкьунар хьурай!

Куругъли Ферзалиев


Всего просмотров: 107

Читайте также: