Медалар вахкана Мегьарамдхуьруьн районда


Мегьарамдхуьруьн районда

Мегьарамдхуьруьн райондин сайтда хабар ганвайвал, алай йисан 3-июлдиз райондин Россиядин халкьарин адетдин культурайрин центрада райондин школаяр акьалтIарнавай гадаярни рушар, школайрин директорар, муаллимар, идарайрин ва организацийрин кьиле авай ксар кIватI хьанвай. Ина эхиримжи йисара хъсан адетдиз элкъвенвай, райондин школаяр агалкьунралди акьалтIарай жегьилрив аттестатар ва “КIелунра кьетIен агалкьунрай” медалар шад гьалара вахкуниз талукьарнавай мярекат кьиле тухвана. 2017-йисуз райондин 50 жегьилди школаяр къизилдин медалралди акьалтIарна. Къейд авун лазим я хьи, алатай йисарив гекъигайла, цIи медалар къачур жегьилрин кьадар артух тир.
КIватI хьанвайбурун вилик рахай Мегьарамдхуьруьн райондин кьил Фарид Агьмедова хъсандиз кIелунай, агалкьунар къазанмишунин диб тир зегьмет чIугунай школаяр акьалтIарнавай жегьилриз, гьакIни аялриз тербия ва чирвилер гунин карда еке роль къугъвай абурун диде-бубайриз, муаллимриз чухсагъул малумарна. Школада къачунвай чирвилери абуруз вилик эцигнавай планар кьилиз акъудуниз куьмекун алхишна.
– Чна квелди дамахзава, умудлу я, куьне “къизилдин медалистдин” тIвар вине кьада, пешекарвилин образование къачуна, куьн, виниз тир дережадин пешекарар яз, хайи райондиз хкведа, Ватандин абадвал патал зегьмет чIугвада. Квехъ сагъвал, бахтлувал ва мадни еке агалкьунар хьурай! – лагьана райондин регьберди.
Гуьгъуьнлай ада юкьван умуми образованидин аттестатар ва къизилдин медалар, гьакIни республикадин олимпиадайра приздин чкаяр кьурбурув РД-дин образованидинни илимдин министерстводин ва маса ведомствойрин дипломар вахкана.

Сулейман-Стальский районда

Хазран Касумов

Сулейман-Стальский райондин администрацияда цIи умуми образованидин школаяр вири вадралди акьалтIарай аялрив аттестатар ва “КIелуна кьетIен агалкьунрай” медалар вахкуниз талукьарнавай шадвилин мярекат кьиле фена. Ана муниципальный райондин кьил Нариман Абдулмуталибова, райадминистрациядин кьилин заместитель Лацис Оружева, РУО-дин начальник Индира Османовади, медалистар гьазурай школайрин муаллимри, выпускникри ва абурун диде-бубайри иштиракна.
– Чи районда хъсан адет ава – гьар йисуз школаяр хейлин аялри медалар къачуналди акьалтIарзава, – тебрикдин келимайрилай гуьгъуьниз лагьана Н.Абдулмуталибова. – ЦIинин йисузни чпи республикадин олимпиадайра, конкурсра ва маса мярекатра кIвенкIвечи чкаяр кьур, райондин тIвар виниз акъудай 57 выпускникди къизилдин медалар къачуна, им дамах ийиз жедай нетижа я. Зун инанмиш я хьи, гележегдани куьне райондин тIвар вине кьада, са шумуд йисалай, пешекарар яз, куьн райондиз хкведа, район вилик тухуник, абад авуник лайихлу пай кутада.
Н.Абдулмуталибова медалриз лайихлу хьайи жегьилрин муаллимризни чухсагъул лагьана, абурун зегьмет лап четинди, гьа са вахтунда герекди, гьуьрметлуди тирди къейдна.
Мярекатдал жегьилрин патай ЦIийихуьруьн юкьван школа акьалтIарнавай Наиля Ризаева рахана, ада чпел чIугур зегьметдай, гайи чирвилерай муаллимриз сагърай лагьана.
Диде-бубайрин тIварунихъай зегьметдин ветеран Нина Эскендарова рахана.
Гуьгъуьнлай Н.Абдулмуталибова 57 выпускникдив медалар вахкана ва абуруз “Гьажи Давуд” ктабар гана.


Всего просмотров: 96

Читайте также:

Добавить комментарий

Войти с помощью: