Гьажи Давудакай мад са ктаб

Саласа юкъуз “Лезги газетдин” редакцияда “Институт финансов и права” УВО-дин ректор, экономикадин илимрин кандидат Рамиз Алиева туькIуьрнавай “Гьажи Давуд” ктабдин презентация кьиле фена. Къейд ийин хьи, ктабда тарихдал машгъул алимри, Дагъустандин илимдинни жемиятдин векилри лезгийрин машгьур регьбердикай кхьенвай макъалаяр гьатнава. Абурун арада С.Гьажиев, Р.Ризванов, Ф.Нагъиев, Къ.Акимов, А.Исмаилов, Гь.Абдурагьимов ва маса авторар ава. Ктабдин редактордин везифаяр филологиядин илимрин доктор Хизри Ильясова тамамарна.

Мярекатда Махачкъала ше­гьер­дин администрациядин ветеранрин советдин председателдин заместитель АбдулмутIалиб Гьамзатова, “Нур” газетдин кьилин редактор Байрам Абдуллаева, “Лезги газетдин” редакциядин векилри — жа­вабдар секретарь Шихмурад Шихмурадова, политикадин ва литературадин отделрин редакторри — Нариман Ибрагьимовани Мердали Жалилова ва масабуру иштиракна. Гуьруьш, сифте гаф рахуналди, “Лезги газетдин” кьилин редактор Мегьамед Ибрагьи­мова ачухна.

Мярекатдин иштиракчийри Гьажи Давудан уьмуьрдин ва женгинин рекьерикай гьазурнавай ктабдин важиблувал, къиметлувал, бажарагълу регьбердин къаматди акьалтзавай несилриз тербия гунин карда къугъвазвай роль къейдна. Кеферпатан Кавказдин исламдин ахтармишунар кьиле тухудай центрадин руководитель Руслан Гереева Гьажи Давуда диндин рекье кьиле тухвай кIвалахрикай ихтилатна.

Рамиз Алиеван гафарай малум хьайивал, ада Гьажи Давудан уьмуьрдикай ва женгинин рекьерикай кхьенвай материалар кIватIун давамарзава ва кьвед лагьай ктабни чапдай акъатун мумкин я.

Презентациядин сергьятра аваз иштиракчийри автордихъ мадни еке агалкьунар хьун алхишна, Рамиз Алиевав жегьилриз ватанпересвилин тербия гунин рекье активнивиляй Махачкъала шегьердин администрациядин ветеранрин советдин патай орден ва Кеферпатан Кавказдин исламдин ахтармишунар кьиле тухудай центрадин патай Гьуьрметдин грамота вахкана.

Агьмед Магьмудов


Всего просмотров: 50

Читайте также: