Гьар сада пай кутан

Къведай йис “Лезги газет” паталди кьетIенди я: адан 100 йис тамам жезва. Алатнавай девирда газетдал са шумуд тIвар хьана. Эхирни адал “Лезги газет” тIвар атана. Гьар са лезгиди 100  йис тамам жезвай йисуз, юбилей мубарак авунин лишан яз, газет кхьиник вичин пайни кутуна кIанда. Газетдин къимет гуя багьа я лугьудай багьнайрикай далда­ кьуна кIандач. КIвализ мугьман атай гьисаб хьурай. Газетди чун йисан эхирдалди, гьар гьафтеда мугьман жез, шадарда­.

Мукьвара газетдин кьилин редактор Мегьамед  Ибрагьимова кхьенвай  “Жуван пайни кутур!” макъалада чна — гьар са ва­тандашди и кардик вичин пайни кутун, тIалабнава. Зи фикирдалди, и кIва­лах гьар са лезгидилай алакьда. Газетдин чинилай чаз агалкьунар къазанмишзавай чи ватандашрикай гзаф чир жезва. Бес лезги чIал хуьн, меденият виликди тухун патал газетди тIимил кIвалах тухузвани!

Галатун тийижиз,  халкьдин къуллугъда акъвазнавай газет чна вирида кхьин лазим я. Абдулашим Рамазанован “Дуьз туш эхир” макъалада вири лагьанва. РД-дин лайихлу муаллим, зегьметдин ветеран яз, адани чаз газет кхьиниз эвер гузва,  редакциядиз — теклифарни. Зегьметдин ветеран, Россиядин журналистрин Союздин член яз, зани вири лезги халкьдиз,  лезгийрин интеллигенциядиз, агъса­къалриз, школайрин, районрин, хуьрерин кьиле авай ксариз, цIийи йисуз газетдин тираж аквадайвал артух жедайвал, ам кхьиниз эвер гузва. Авай са милли  газетни кхьин тахвурла, ахпа гьикI жезвайди я? Газет вири халкьдинди я. Адакай къана рахазвайбур жуван хайи чIалакайни пис рахазвайбур я. Редакциядин коллективди, кьилин редактор Мегьамед Ибрагьимован регьбервилик кваз, газетдин 100 йисан юби­лей жезвай йисуз, умудлу я, цIийи рубрикаяр кардик кутада, газет кIел­за­вайбурун, ам кхьизвайбурун тIала­бунар, истемишунарни фикирда кьада.

Эхирдай заз, вири лезги халкьдихъ элкъвена, лугьуз кIанзава:

Виш йисакай агъзур хьурай,

ЧIалан рехъ ваз югъур хьурай,

Вун кхьидай чи лезгияр

Йисалай-суз артух хьурай!

 

“Лезги газет”, “Лезги газет” —

Чи чIал хуьзвай гуьзгуь газет,

Гьар гьафтеда чи уьмуьрдин

Тушни бес вун ризкьи,  газет.

Ш.Багъиров


Всего просмотров: 46

Читайте также:


Новости партнеров