Эцигунар: мумкинвилер ва месэлаяр

19-июндиз Дагъустандин Кьилин везифаяр вахтуналди тамамарзавай Владимир Васильева Дагъустан Республикадин Хатасузвилин Советдин заседание кьиле тухвана.

РД-дин Кьилин ва Гьукуматдин Администрациядин пресс-къуллугъди хабар гузвайвал, заседанидал залзалаяр хьунин хаталувал авай чкайра гзаф мертебайрин дараматар эцигунихъ галаз алакъалу месэлайриз килигна ва шегьерра эцигунар кьиле тухуниз талукь законодательстводал амал авунин, и рекьяй хатасузвал таъминарунин барадай исполнительный властдин  ва чкадин самоуправленидин органри кьабулзавай серенжемар веревирдна.

РикIел хкин: республикада, садални алукь тийиз, гзаф квартирайрин кIвалер эцигунин кIвалахар гегьеншдаказ тухуз хьана. Гьа са вахтунда муниципальный тешкилатриз ахьтин дараматар гъиле-гъил аваз, суддин къарардал вил алаз акъваз тавуна, чукIурдай ихтияр авайди тир.

Заседанидал рахай республикадин руководителди малумарайвал, Махачкъалада кьиле тухузвай эцигунри, са патахъай, еке мумкинвилер ачухзава, муькуь пата­хъай лагьайтIа, кьил тIардай месэлаяр арадал гъизва.

РД-дин эцигунрин ва ЖКХ-дин министр Малик Баглиева къейд авурвал, ихьтин гьалар шегьерра эцигунар кьиле тухунин кIвалахдин гьакъиндай РФ-дин законодательстводал амал тавунин нетижада арадал атайди я. А законодательстводал асаслу яз, шегьерра эцигунар вини дережада аваз кьиле тухун таъминарунин патахъай чкадин самоуправленидин ва государстводин органрин хиве жавабдарвал гьатзавайди я.

Идахъ галаз алакъалу яз, гележегда законсуздаказ эцигунар кьиле тухунин вилик пад кьадай мумкинвал гудай къайдаяр кардик кутунин чарасузвал авайди малумарна. Малик Баглиеван фикирдалди, РД-дин архитектурадин ва шегьерра эцигунар кьиле тухунин рекьяй цIийиз тешкилнавай Комитетдин руководстводи пландилай къецяй муниципалитетрин архитекторрин аттестация кьиле тухун, абуру пешекарвилин жигьетдай чпивай ийизвай истемишунриз жаваб гузватIа тайинарун герек я. Идалайни гъейри, муниципальный тешкилатриз шегьеррин микрорайонрин ва кварталрин мулкар дуьзгуьн къайдадиз гъунин проектдин патахъай Комитетдихъ галаз меслятар авун  теклифна. Эхирдай министрди Дагъустандин тарихда сифте яз тешкилзавай цIийи къурулушди – РД-дин Кьилин патав гвай шегьерра эцигунар кьиле тухунин рекьяй советди бегьерлудаказ кIвалахуник умуд кутуна.

Заседанидин иштиракчияр экономикадин ва суьрсетдин барадай Дагъустан Республикадин хатасузвал таъминарунин мураддалди кьабулзавай серенжемризни килигна.

Заседанидал гъанвай месэлаяр веревирд авунин карда РД-дин Халкьдин Собранидин Председатель Хизри Шихсаидова, РД-дин Гьукуматдин Председатель Артем Здунова, РД-дин Кьилин ва Гьукуматдин Администрациядин руководитель Владимир Иванова, республикадин министерствойринни ведомствойрин, муниципальный тешкилатрин руководителри ва жавабдар къуллугърал алай маса ксари иштиракна.

Чи мухбир


Всего просмотров: 42

Читайте также: