Дуьньяда

Дяведин ветеранриз — 75 агъзур

Россиядин Президент В.Путина ЧIехи Гъалибвилин 75 йисан­ юбилейдихъ галаз алакъалу яз дяведин ветеранриз 75 агъзур ма­­­­нат, далу пата зегьмет чIугур­бу­руз 50 агъзур манат пул чара авун хиве кьуна. Идакай “Lenta.­ru” чешмеди хабар гузва.

Адет яз, Гъалибвилин суварихъ галаз алакъалу яз ветеранриз са сеферда яз гузвай пулдин такьатрин кьадар 10 агъзур манатдикай ва далу пата зегьмет чIу­гурбуруз  тайинарзавай  такьатар  5 агъзур­  манатдикай  ибарат  жезвай.

“Гъалибвилин 75 йис я, гьавиляй, за фикирзавайвал, чна гьа ре­къемдихъ галаз алакъалу яз пулдин куьмек гуда. Ватандин ЧIе­хи дяведин ветеранриз ва ихьтин дережа авай вирибуруз чна 75 агъзур манат чара ийида”, — лагьана В.Путина.

Къейд ийин, ЧIехи Гъалибвилин 75-йисан юбилейдин гьуьрметдай В.Путина 2020-йис РикIел хкунин ва баркаллувилин йис яз малумарнава.

Дуствал хуьнин меслят

Америкадин “Вири халкьарин алакъайрин рекьяй советдин” пешекар Р. Блэквилла Китайдиз аксивал къалурунин сергьятра аваз США-диз Россиядихъ галаз дуствал хуьн теклифна. Идакай “ТАСС” чешмеди хабар гана.

Пешекарди раижнавай докладда дуьньядин майданда Китайдиз аксивал авунин рекьяй Россиядихъ галаз санал умуми план туькIуьруниз эвер гана. Ада Вашингтонди Москвадихъ галаз менфятлу алакъаяр арадал гъун хъсан яз гьисабзава. Пешекардин фи­­кир­далди, эгер Россиядиз талукь яз исятда кьиле тухузвай сия­сатдин гьалар давамарайтIа, США-дивай Россиядихъ галаз кьве тереф­дизни хийирлу алакъаяр хъсанариз жедач. Кьилди къа­чуртIа, ада кьве терефдиз санкцияр къуватдай вегьин, НАТО гегьен­шарунин гьерекатар акъвазарунин гьакъиндай икьрардал атун теклифзава.

США-дин оборонадин министерстводик Россиядин ва Китайдин яракьлу къуватар артух хьуни къалабулух кутунва. И жигьет­дай­ ала­тай йисан декабрдин вацра къурулушдин министр Марк Эсп­ера малумарнай.  13-декабрдиз США-дини Китайди чеб алишверишдин дяведал эхир эцигуниз талукь икьрардал атайдакай хабар ганай.

Япония гьалдариз кIанзава

США-дин кьиле авайбуруз Россиядиз акси яз тухузвай сиясатдик Японияни кутаз кIанзава. “Lenta.ru” чешмеди хабар гузвайвал, ихьтин фикир и йикъара кьиле фейи пресс-конференциядал Россиядин МИД-дин кьилин везифаяр тамамарзавай С. Лаврова малумарна.

Адан гафаралди, Токио Америкадин терефдин военный стратегиядин паярикай сад я. Япониядинни США-дин арада кьабулзавай документриз, арзайриз, къарарриз фикир гайитIа, Лаврован фикирдалди, Америкадин терефди Россия мидя хьиз къалурунин карда анжах вичин гьерекатар тестикьарун патал алакъайрикай менфят къачузва.

“Чаз, гьелбетда, чна регьимлу къунши яз гьисабзавай Япониядин мулкарилай  къурхулувилер арадал атана кIанзавач”, — лагьана С.Лаврова. Гьа са вахтунда ада къейд авурвал, Япониядин руковод­стводиз РФ-диз талукь яз чIуру ниятар авач. Къейд ийин, Россиядинни Япониядин арада ислягьвилин икьрардал къулар чIугун  тавуна 70 йисалайни гзаф вахт я.

50 террорист тергна

Эхиримжи кьве юкъуз Сирияда Россиядин аскерри “Хайат Тахрир аш-Шам” (ам Россияда къадагъа авунва) кIеретIдин 50 террорист тергна. Абуру Сириядин яракьлу къуватрал гьужумнавай. Женгерин нетижада Сириядин аскеррикай 12 телеф, 24-дални хирер хьана. Идакай “РБК” телеканалди хабар гана.

Чешмеди къейдзавайвал, 17-январдиз террористри пилот гала­чир аппаратдин куьмекдалди Сириядин Алеппода гьукуматдин кьушунар авай терефриз ягъунар кьуна. Са суткада Идлибдин мулкара боевикри 62 сеферда гуьлле гана. Идлибда 9-январдиз гуьлле гунин гьерекатар акъвазарнай. Ихьтин къарар В.Путина ва Р.Эрдогана чпин арада гуьруьш кьиле фейи вахтунда кьабулнай. Амма боевикри секинвал хуьн тавурвиляй пакадин юкъуз, 10-январдиз, а мулкара женгинин гьерекатар давамар хъувуниз мажбур хьана.

ШартI малумарна

Великобританиядин премьер-министр Б.Жонсона Россиядин Президент В.Путиназ кьве уьлкведин арада гьалар пайгардик кухтунин шартI малумарна. Жонсонан фикирдалди, гуя Москвади хатасузвилиз къурху гузвай гьерекатар акъвазарайтIа, гьа чIавуз уьлквейрин арада алакъаярни хъсанариз хъжеда. Жонсонан пресс-секретарди хабар гайивал, премьер-министр Берлинда Ливиядиз талукь яз кьиле фейи саммитдин сергьятра аваз В.Путинахъ галаз гуь­руьшмиш хьана ва абуру Ливияда, Сирияда, Иракда ва Иранда хатасузвилин гьалар арадал хкунин месэлаяр гьялунин чарасузвал веревирдна.

“Премьер-министрди малумарна хьи, Россияди Великобританиядиз ва чи терефдарриз къурху гунин ва чи ватандашрик секинсузвал кутунин крар акъвазарайтIа, гьа чIавуз кьве терефдин арада рафтарвилер гуьнгуьна гьат хъийида”, — малумарна Великобританиядин премьер-министрдин пресс-секретарди.

Гьазурайди — К.Ферзалиев


Всего просмотров: 57
Подпишитесь на наши каналы:

Читайте также:


Новости партнеров