Дуьньяда

Пуд лагьай гьужум

Россияда къадагъа алай ИГИЛ-дин террористрин дестедин боевикри и мукьвара Сириядин Хомс вилаятда пуд лагьай сеферда яз гегьенш гьужум­ башламишна. Идакай Al-Masdar News чешмеди хабар гузва.

Чешмедин делилралди, террористри Бадия районда Сириядин гьукуматдин яракьлу къуватрин дестедал гьужумна ва Пальмирадихъ гьерекатун патал рехъ ахъаюнин алахъунарна. Кьилди къачуртlа, боевикри са мус ятlани чпин даях хьайи, Хамима районда авай Сириядин кьушунрал гьужумна. Давам жезвай женгерин нетижаяр гьелелиг малум туш.

ИГИЛ-дин боевикри Пальмира 2015-йисан майдиз кьунай. 2016-йисан мартдин вацра Сириядин гьукуматдин кьушунрилай, Россиядин авиациядин куьмекни галаз, шегьер вахчуз алакьнай. Амма а йисан декабрдин вац­­ра Пальмира мад террористрин гуьзчивилик акат хъувунай.

2017-йисан 2-мартдиз Россиядин оборонадин министр Сергей Шойгуди Президент Владимир Путиназ Пальмира шегьер ИГИЛ-дин террористрикай азадунин женгерин гьерекатар акьалтlарайдакай малумарнай. Адалай кьулухъ, шегьердин сергьятра хъиткьиндай затlар зарарсуз хъувун патал Сириядиз Россиядайни саперар рекье тунай.

Автомобилдин еринда – балкlан

“Адалатлу Россия” партиядин патай Камчатский крайдин заксобранидин депутат Михаил Пучковскийди бензиндин къимет багьа тирвиляй вич автомобилдин еринда балкlан ишлемишуниз мажбур хьанвайди къейдна. Гьавиляй ада Камчатский крайдин гьукуматдин дараматдин патав балкlан кутlундай махсус чка тешкилун истемишнава. Идан гьакъиндай Kam24.ru чешмеди хабар гузва.

Депутат хьуниз килигна, сессийра иштиракун адан везифайрик акатзава. Михаил Пучковскийдиз пенсиядилай гъейри менфят къведай маса чешме авач, гьавиляй адаз хсуси улакьда багьа къиметдай бензин цадай мумкинвал амукьзавач. Гьатта автобусдиз билетар къачунни четин ялда вичиз. Июндин эхирра нубатдин сессия кьиле фидалди балкlандиз чка тайинарун тlалабнава.

Законодательный собранида кlвалахунай адаз мажиб къвезвач. Хсуси кlвале яшамиш жезвай адан майишатда са шумуд балкlан ава.

Регьберар гуьруьшмиш жеда

США-дин президент Дональд Трамп КНДР-дин регьбер Ким Чен Ынахъ галаз гуьруьшмиш хьунал рази хьана. Идан гьакъиндай Bloomberg чешмеди хабар гузва.

Идалай вилик КНДР-дин регьберди США-дин президентдиз гуьруьш тешкилуниз вич гьазур тирдан гьакъиндай чар ракъурнай, амма чарче США патал метлеблу месэлайрин патахъай разивал гудайди къейднавачир.

Малумарзавайвал, Трампав кагъазар вахкудалди вилик абур США-дин жавабдар векилри ахтармишзава. Кьве уьлкведин регьберрин гуьруьш 12-июндиз Сингапурда кьиле фидайвал я.

Алатай гьафтеда Америкадин регьберди Пхеньяндин мидявилин арзаяр себеб яз КНДР-дин регьбердихъ галаз гуьруьшмиш хьун намумкин кар тирди лагьанай.

Гуьруьшдин тема Кореядин полуостров ядердин яракьрикай азад тир зонадиз элкъуьруниз талукьди жеда.

Мукьвара Кореядин Зегьметдин партиядин векил Ен Чхоль гуьруьшдиз гьазурвал акунин жигьетдай меслятар авун патал Нью-Йоркдиз фена.

Пис рекьер

“Хабарар” РИА-ди малумарзавайвал, дуьньяда виридалайни пис ва виридалайни хъсан рекьер авай уьлквейрин сиягь туькlуьрнава. Сиягьда гьатнавай 137 уьлкведин рекьерин ери 1-далай 7-дал кьван баллар тайинаруналди чирнава. Амма вини дережадин 7 балл къведай хьтин еридин рекьер гьич са уьлкведани авач.

Виридалайни пис рекьер Мавританияда ава. Конго ва Гаити уьлквейри 2,1 баллар къачуна.

Виридалайни хъсан рекьер авайбур Арабрин Эмиратар (6,4 балл), Синга­пур (6,3 балл), Щвейцария (6,3 балл), Гонконг (6,2 балл) ва икl маса уьлквеяр яз гьисабзава.

137 уьлкведикай ибарат сиягьда Россия 114-чкадал ала.

Уьлкведай экъечlун истемишзава

Сириядин вице-премьер Валид Муаллема США-дивай чпин кьушунар Сириядин республикадай ахкъудун истемишнава. Идан гьакъиндай ада Дамаскда кьиле фейи пресс-конференциядал малумарна.

“Эт-Танф базадай ва Сириядин вири мулкарай США-ди чпин кьу­шунар ахкъудайдалай кьулухъ чун Кьиб­лепатан Сириядин хатасузвилин гьа­къин­дай рахада”, – лагьана ада.

28-майдиз Россиядин къецепатан крарин министр Сергей Лаврова Америкадин кьушунар эт-Танфдай ахкъудуник умуд кутазвай гафар лагьана. Ада къейд авурвал, Сириядин кьиблепатан сергьятдал анжах и уьлкведин кьушунар хьун герек я. Министрди тестикьарзавайвал, эт-Танфда кьил акъат тийидай крар кьиле физвайдан гьакъиндай Москвадихъ хейлин делилар ава. “Военный жигьетдай лагьайтlа, и райондихъ террористриз акси гьерекатар кьилиз акъудунин карда еке метлеб авач”, – малумарна С.Лаврова.

Гуя террористрихъ галаз женг тухуникай багьна кьуналди, 2017-йисан апрелдиз ана къанунсуздаказ США-дин военный базайрикай сад эцигна.

Гьазурайди – Куругъли Ферзалиев


Всего просмотров: 33

Читайте также: