Дуьньяда

Сад-кьве вацралай…

Сеченован тIварунихъ галай МГМУ-дин илимдин пешекарди Россияда ва дуьньяда коронавирусдин тIугъвал тамамвилелди куьтягь жедай муддат малумарнава. Ада къейднавайвал, вирусдикди начагъ хьанвай инсан тамамвилелди сагъ хъхьун патал 3-4 гьафте герек жезва. Идахъ галаз алакъалу яз, коронавирус акатай эхиримжи дуьшуьшдилай кьулухъ 3-4 гьафтедилай и ва маса уьлкведа михьиз тIугъвал акьалтIнава лугьуз жеда. Пешекардин фикирар “Парламентский газетди” раижнава.

Адан фикирдалди, эгер дуьньядин вири часпарар гатун вахтунда кIевирна амукьайтIа, вирус садакай масадак акатунин гьалар цIийи кьилелай къизгъин хъхьуниз рехъ тагайтIа, Россияда коронавирусдин тIугъвал августдиз куьтягь жеда.

Гьа са вахтунда РФ-дин Минздравдин инфекционист Е.Малинниковади чи уьлкведа июлдин вацра тIугъвал куьтягь жеда ла­гьанва.

Къейд ийин, коронавирусди гзафни-гзаф США-дин, Россиядин­, Ве­ликобританиядин, Бразилиядин, Испаниядин агьалияр акIа­жар­нава.

20-майдин делилар фикирда кьуртIа, дуьньяда коронавирус акатнавайбурун кьадар 4 901 773-дав агакьанва, абурукай 323 413 кас кьенва, 1 691 491 — сагъар хъувунва. Россияда коронавирусди начагъарнавайбурун кьадар 308 705-дав агакьнава, абурукай 2972 кас кьенва, 85 392 — сагъар хъувунва.

Зегьемлу гад жеда

ЦIи Россияда лап чими, амма гьавада садлагьана дегишвилерни кьиле фидай гад жеда. Пешекарри виликамаз хабар ганвай­вал, гатун береда чимивилерихъ галаз сад хьиз еке гарарни, юр­гъарни арадал къведа. Ихьтин фикир уьлкведин Гидрометцентрадин илимдин регьбер Р.Вильфанда “Интерфаксдиз” малумарна­.

Алава хъийизвайвал, чими, кьурагь гьаваяр себеб яз цIаяр кьунихъ галаз алакъалу вакъиаярни гзаф хьун мумкин я.

Хъсанвиляй — хъсанвал

“Новости” РИА-ди хабар гузвайвал, США-ди Россиядиз ИВЛ-дин (искусственный къайдада нефес къачуз куьмек гудай) 200 аппарат ракъурда.

Идалай вилик Вашингтондин тIалабуналди Москвади коронавирусдихъ галаз женг чIугунин карда США-диз куьмек ганай. Кьилди къачуртIа, 1-апрелдиз Россияди “Руслан” Ан-124 самолетда аваз Америкадив гуманитарный куьмек агакьарнай.  Гила чпин нубатда США-дини пулсуздаказ Россиядиз медицинадин тадаракар ракъурун кьетIнава.

Къейдзавайвал, США-да ИВЛ-дин аппаратар туькIуьрунин кIва­­лах гегьеншарайдалай кьулухъ Д.Трампа Россиядин терефдиз куьмек гун хиве кьунай.

ЯцIу жезва

Коронавирус себеб яз, жува жув жемиятдивай яргъа авунин шартIар малумарнавай муддатда кIвале ацукьна кIвалахуниз маж­бур хьанвай гьар кьуд лагьай россиявидин заланвал артух хьанва. “Интерфакс” чешмеди раижзавайвал, ихьтин делилар уьлкведин жуьреба-жуьре агьалийрин иштираквал аваз махсусдаказ кьиле тухвай ахтармишунрин нетижада малум хьана.

Вахтуналди офисра кIвалах тийизвай къуллугъчийрикай 24%-ди­ чпин заланвал авайдалай артух хьанвайди хиве кьуна. Са ар­тух юзун-гьерекатдик кумачирвиляй инсанар яцIу жезва. Гьа са вахтунда ватандашрин 12 %-ди чеб яхун хьанвайдакай хабар гана.

Сеченован тIварунихъ галай МГМУ-дин пешекар Н.Пугачевади ихтилатнавайвал, кIвале ацукьна кIвалахзавай вахтунда мукьвал-мукьвал тIуьн тавун хъсан я, гьикI хьи, и кар гележегда вердиш хьанвай адетдиз элкъведа.

Кьисасдин бягьс кIанзава

Какахьай жуьредин женгерин спортсмен Конор Макгрегораз боксер Флойд Мэйуэзерахъ галаз кьисасдин бягьс кьиле тухудай­ ният ава. Идакай ирландви спортсменди вичин Twitter-да кхьенва, хабар гузва «Лента.ру» чешмеди.

Макгрегора вичи Мэйуэзерахъ галаз боксдай кьиле тухвай женгиниз мад сеферда килиг хъувурдакай ва, эгер кьисасдин бягьс тешкилайтIа, вичивай адан винел гъалибвал къачуз жедайдакай кхьена. “Сифтегьан раундра зун гъалиб хьана, гьатта эхиримжибурани, кIвачери кIвалахзамачиртIани, за ам кукIварзавай”, — инанмишвилелди кхьена ирландвиди.

Америкави боксердихъ галаз ирландвиди 2017-йисуз бягьс кьиле тухванай. А чIавуз 10-раундда технический нокаутдалди Конор кумукьна.

Эстонияди агалкьунар раижна

Яшайишдин крарин рекьяй Эстониядин министр Т. Кийка уьлкведилай коронавирусдин азардин винел гъалибвал къазанмишиз алакьнавайдакай ихтилатна. Идакай “ERR” чешмеди хабар гузва.

Адан гафаралди, Эстония исятда вирусдин кьвед лагьай “лепедал” дуьшуьш жезва. “Эгер ВОЗ-дин индикаторриз килигайтIа, исятда­ Эстониядин мулкара тIугъвал чукIунин гьалар авач”, — къейд­на мини­стрди. Адан фикирдалди, ихьтин нетижаяр вахтунда ва эсер­лудаказ карантиндин серенжемар кьабулуни гъана. Эхиримжи­ делилралди, и уьлкведа коронавирус акатнавай 1758 дуьшуьш дуьз­дал акъуднава. Эхиримжи юкъуз анжах са касдик вирус акатна,­ санлай къачурла, Эстонияда коронавирусдикди начагъ хьайи 62 кас кьена.

«Лезги газет»


Всего просмотров: 62
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире