Дагъвидин къуват

Залан атлетикадай рекьяй са шумуд рекорддин сагьиб, путар хкажунай еке алакьунар ва агалкьунар авай къуватлу пагьливан  Эмин  Ибрагьимов  халкьдин арада фадлай машгьур я. 

Ам 1960-йисуз Докъузпара райондин Мискискарин хуьре дидедиз хьана, ина мектеб куьтягьна. 1982-йисуз Новочеркасск шегьердин ме­лио­ра­ция­дин институт акьалтIарайдалай кьулухъ са шумуд­ йисуз ПМК-да кIвалахна. Сту­дент­вилин йисара ам азаддиз кьуршахар кьунал ва залан атлетикадал рикIивай машгъул жезвай. ТIебиатди кьетIен къуват ганвай дагъви гуьгъуьнлай анжах гиряяр, штангаяр хкажунин спортдал элячIна. Сифтегьан агалкьунрини чеб геждалди вилив хуьз тунач. 1988-йисуз гужлу са­ки 300 пагьливандин арада кьиле фейи Советрин Союздин чемпионатда ада 4-чка кьуна. Гуьгъуьнин йисара 5 сеферда Дагъустандин ва 2 сеферда Россиядин пагьливанрин арада кьиле фейи акъажунра 2-чкаяр кьуна.

1991-йисуз Нижний Новгородда кьиле фейи “Россиядин зурба пагьливанар” турнирда Эмин Иб­рагьимова вири гьейранарна. Путар хкажунай­ ада и акъажунрин вахтунда са шумуд рекорд эциг­на. Кьилди къачуртIа, 70 килограммдин за­лан­­вал авай пут ада са гъиливди 7 сеферда хкажна­.

Нубатдин цIийи рекорд ада 1998-йисуз Москвада кьиле фейи “Россиядин къуватлу инсанар” акъажунра эцигна — 32 килограммдин заланвал авай кьве пут са декьикьада 35 сеферда хкажна.

Пагьливанди 2000-йисалай спортдин ветеранрин турнирра иштиракзава, гъалибвилерни къазанмишзава. “Шарвили” эпосдин суварин сергьятра аваз тешкилзавай спортдин акъажунра ада гьар йисуз алакьунар къалурзава. Жегьилвал къа­къатнаватIани, къуватдинни руьгьдин жигьетдай зайиф тахьанвайди субутзава. ИкI, жуьреба-жуьре акъажунра хейлин гъалибвилерни агалкьунар хьанвай, 60 йисан яшда авай къудратлу дагъвиди, Шалбуз дагъдин кукIуш­дал хкаж хьана, экстремальный шартIара 16 ки­лограммдин 2 пут 2 декьикьадани 50 секундда 70 сеферда хкажна.

2013-йисуз Курск шегьерда кьиле фейи чемпионатда яшар хьанвайбурун арада Эмин Ибрагьимова гъалибвал къачуна. Алай вахтунда пагьливанди Махачкъала шегьерда залан атле­тикадин рекьяй жегьилрихъ галаз кIвалах тухуз­ва, адахъ алакьунар авай ученикарни хьанва.

Пагьливанди къейдзавайвал, пут хкажун патал, къуватдилай гъейри, дурумлувални, руьгьдин цицIивални герек я. Къуй чи ватандаш мадни цIийи дережайрив агакьрай!

К. Ферзалиев


Всего просмотров: 174
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире