Дагъустандин вузрай хабарар

ДГТУ

24-26-октябрдин йикъара Дагъустанда  Жегьилрин инновациядин яратмишунрин центрадин  (ЦМИТ)  Вирироссиядин конференция кьиле фида, хабар гузва Дагъус­тандин государстводин технический университетдин  пресс-къуллугъди.

Мярекатдин сергьятра аваз мугьманри ва пешекарри экология авай гьалдиз талукь, гьакIни милли “Экология” проект уьмуьр­диз куьчуьрмишунин месэлаяр веревирдда.

Конференциядин иштиракчияр патал, ха­бар гузвайвал, “элкъвей столар” ва  мас­тер­-классар, выставкаяр ва са жерге маса мя­­­рекатар тешкилда, Рос­сиядин Государ­ст­­водин Думадин образованидин ва илимдин рекьяй Комитетдин, экономикадин ми­нис­тер­стводин патай делегатри докладар ийида­.

Идалайни гъейри, конференциядин  тешкилатчийри Центрадин къуллугъчийрин арада экологиядиз талукь виридалайни хъсан проект хкягъун патал конкурс кьиле тухун планламишнава. Адан иштиракчи хьун патал Центрадин сайтда  (cmit.online)  10-сентябрдилай 10-октябрдалди арза гун лазим я. Конкурсдин гъалибчи ЦМИТ-дин  къецепатан уьлквейра 2020-йисуз  тежриба къачудай пешекаррин сиягьдик кутада. Къейд ийин, конференциядин кIвалах 23-октябрдиз Москвада башламиш жеда.

ДГУ

РФ-дин илимдин ва кьилин образованидин министерстводи  интернетда кьилин об­разованидин идарайрин финансрин менеджментдин  еридиз талукь яз туькIуьрна­вай  сифтегьан  сиягь эцигнава. Финансрин менеджмент — им карханади хсуси пул­дин такьатриз талукь яз тухузвай кIва­лах, абур дуьздаказ ишлемишун я лагьай­тIа жеда. Карханадин къазанжияр ва хийир­лувал хкаж жез хьайитIа, адан менеджмент нетижалуди яз гьисабзава.

2018-йисан делилралди, Дагъустандин государстводин университет (ДГУ)  финансрин менеджментдин ери виниз тир дережада авай вузрин дестедик акатнава. ИкI, 2017-йисуз алай 101-чкадилай  ам 2018-йисуз 35-чкадал хкаж хьанва.

ДГУ-дин финансрин менеджментдин дережа, тайинарнавай кьадар 80 процент яз, 90,58 процентдив агакьнава. И сиягьда республикадин  мад кьве вуз ава. ИкI, Да­гъустандин государстводин педагогический университет (ДГПУ) — 144  ва Дагъус­тандин государстводин технический университет (ДГТУ)  210-чкайрал ала.

Рейтингдин  нетижаяр министерстводи федеральный бюджетдай вичин къаюмвилик квай вузриз капитальный ремонт ва асул такьатар къачун патал субсидийрин такьатар чара ийидайла гьисаба кьада.

ДГУНХ

Дагъустандин государстводин халкьдин майишатдин университетдин  студентар алатай кIелунин йисуз са шумуд сеферда студентрин арада кьиле тухузвай международный Интернет-олимпиадайрин гъалибчияр хьана, хабар гузва вуздин пресс-къуллугъди.

Идахъ галаз алакъалу яз, Интернет-олимпиадайрин  тешкиллувилин комитетди ДГУНХ-диз “2019-йисан студентрин международный ачух Интернет-олимпиадайрин гъалибчи” лагьай гьуьрметдин тIвар ганва. Идахъ галаз алакъалу яз вузда­ гъалиб хьайи студентриз пишкешар гунин мярекат кьиле фена.

Санлай къачурла, олимпиадайра вуздин 200-далай артух студентри иштиракна. Эхиримжи паюна лагьайтIа, 7 кас гъалибчияр хьана.

Амина Муслимова


Всего просмотров: 17

Читайте также: