Чешне къачуналди

Малум  хьанвайвал,  Курхуьруьн жемят 15 тухумдикай ибарат я. Рамазан Лакарар тухумдин сифтегьан векил хьана. Адан гада Шай­да — кьвед лагьай несилдин. Шай­дадин несил хуьре виридаз хийирлу краралди тафаватлу тир, исятдани гьакI я. Ам вич хци зи­гьин­ авай, акьул­лу, гзаф крарикай гьакъикъи делилар чидай ва абурун гьавурда масадбурни тваз алакьдай кас хьана. Ихьтин ерияр гьи­саба кьуналди хуьре 1958-1960-йисара юкьван мектебдин ди­ректор хьайи Татархан хуьряй тир Амирасланов Анварбега (рагьмет хьурай вичиз) Шайда бубадиз “Чан алай тарих”­ лугьудай. Адавай муаллимди тарихдин гзаф делилар чирнай.

Шайдадин чIехи гада МелгьятI хуьре колхозник тир.  Ада майи­шатдин вичел ацалтай гьар са кIвалах намуслувилелди тамамарна. Гзаф йисара нехирбанвал, рамагбанвал авуна. Фашистрин Германияди чи Ватандал вегьейла, цIудралди маса жегьилрихь галаз санал МелгьятIни армиядиз тухвана. Ам уьлкведин жуьреба-жуьре шегьерриз акъатнай. Сифтедай адакай стрелок, ахпа тупчи артиллерист хьанай. М.Шайдаева Саратовдин, Сталинграддин патарив кьиле фейи къати женгера иштиракна. Абур гьакI алатнач  — ам са тIимил япарал залан,  вилерин эквни зайиф хьана. Ам “За боевые заслуги”, “За освобождение Сталинграда”, “За победу над Германией” медалрин сагъиб тир. Армиядай Шайдаев 1946-йисуз хтанай, ада колхозда кIвалахун давамарна.

М.Шайдаеван хва Агъасултаназ Афгъанистандин дяведа иштиракун кьисмет хьана. Кандагар шегьер ва къваларив гвай хуьрер  моджахедрикай хуьдайла, яракьар, суьрсет авай складрал къаравулвал чIугва­дайла Агъасултана вич викIегь аскер тирди къалурна. Командирдин тапшуругъар лазим тирвал кьилиз акъудна. Ам вад наградадиз лайихлу хьана. Абурун арада “Афгъанистандин халкьдин патай интернационалист аскердиз” медални ава. Къуллугъна хтайла, ада механизаторвал давамарна.

Чешнелу механизатор Дагъустандин  Верховный Советдин депутатвилени хкянай. Агъасултан Шайдаев мукьвал-мукьвал школь­никрихъ галаз гуьруьш жезва, абуруз дяведикай, вичин аскервилин рекьерикай суьгьбетзава.

Райсудин Набиев


Всего просмотров: 34

Читайте также: