Бул бегьердин йис

Райондин мулкарикай 9500 гектар хуьруьн майишатдинбурук акатзавайди, продукция гьасилунал хуьруьн майишатдин 27 кархана, 900 арендатор ва 20800-далай виниз хсуси куьмекчи майишатар машгъул жезвайди фикирда кьуртIа, инанмишвилелди лугьуз жеда хьи, Сулейман-Стальский район хуьруьн майишатдин муниципалитетрик акатзава.

Алай вахтунда, хуьруьн майишатдин карханайра хьиз, арендаторрин, ЛПХ-рин учас-токрайни емишар, салан ва бустандин няметар кIватI хъувунин кIвалахар давам жезва. ПIинияр, шурван пIинияр, фад агакьзавай сор­тарин хутар, чуьхверар, шефтелар, машмашар кIватIна акьалтIарнава. ЦIинин йис бе­гьер­луди я. Гьавиляй гьар са гектардай 200-240 центнер шефтелар, 100-120 центнер ху­тар­ кIватI хъувур ЛПХ-ярни ава. Чи райондин шартIара им хъсан нетижа я.

Районда чIехи майданра хуьруьн майишатдин карханайри ичер, шефтелар, хутар гьасилзава. Мисал яз, шуьмягъар, куьмекчи майишатра ва кьилдин ксарин усадьбайра битмишарзавай. Районда инвестицийрин проектар уьмуьрдиз куьчуьрмишун яз, эхиримжи йисара менфятлу емиш тир шуьмя­гъар хуьруьн майишатдин карханайрани гьасилзава. ИкI, са шумуд йисан вилик Цмуррин хуьруьн мулкунал инвесторди 40 гектарда шуьмягъдин багъ кутуна.

Вини СтIалрин хуьруьн мулкунал фад бегьердал къведай багълар кутунин зурба “СтIалрин багълар” проект уьмуьрдиз куь­чуьр­мишзава. Инани еке майданра шуьмягъ­­дин багълар кутада.

— Чи хуьрера шуьмягъдин багълар гзаф ин­санри чпин кIвалерихъ галай чилин участокра кутунва, — лугьузва райондин хуьруьн ма­йишатдин ва суьрсетдин управленидин начальникдин заместитель Гьамидин Абдулкъафарова. — Эхиримжи йисара са килограмм шуьмягъар чи хуьрерин агьалийри 130-150 манатдай маса гайиди фикирда кьуртIа, лугьуз жеда хьи, им менфятлу хел я. Идалайни­ гъейри, шуьмягърин къелемрихъ са артух гел­къуьнни герек къвезвайди туш, акъатзавай харжарни чIехибур я лугьуз жедач.

Яваш-яваш районда ичерин, шуьмягъдин, чумалрин, геж дигмиш жезвай чуьхверрин, хутарин ва маса емишрин бегьерарни агакьда. ЛПХ-яр, арендаторар абур кIватI хъувунизни гьазур я. Хизандин игьтияжриз серф авурбур квачиз, артуханбур агьалийри муьштерийриз маса гузва.

Эхь, багълара дигмиш хьанвай емишрин бегьерди рикIерик шадвал кутазва. Къуй чи чилел гьар са йис бегьерлуди хьурай!

Хазран Кьасумов


Всего просмотров: 13

Читайте также: