Баркалла квез!

Гьуьрметлу газет кIелзавай ватанэгьлияр! ЦIийи йис алукьна, вичин тахтуна гьатнава. Вахтуни чун ва чи гележег патал кIвалахзава. КIа­н­завайди чнани бушвал, къайгъусузвал, пелешвал къалур тавун­ я.

2020-йис чи газетдин 100 йисан юбилейдинди хьуниз килигна, ам кхьин, маш­гьурун, хуьн патал чпин къуьн ку­таз­вай рухвайризни рушариз чна рикIин сидкьидай баркалла, сагърай куьн лугьузва.

Алатай нумрада “Лезги газетдин” 10 ва адалай гзаф экземплярар кхьиниз пулдин такьатар жагъурай хейлин ксариз (Махачкъалада, Каспийскда, Дербентда) чна Аяз-Бубадин тIварунихъай тебрикдин чIалар рекье тунвай. Гьелбетда, вири тIварар чир хьанвачир. Гила­ни чун шегьеррани чIехи хуьрера ва районра ни гьикI кIвалахзаватIа чириз алахънава. Чавай жедай гьуьрметар вири вахтара хъийида. Куьн галачиз чавай руьгьдин ихьтин зурба къул михьидаказ, гужлудаказ хуьз тежедайди ашкара я.

КIелзавайбурун ва чаз кхьизвайбурун еке дестеяр чи къуват ва илгьам­дин бине я, куьн галаз чун къуватлу я.

И гафар тамамвилелди Каспийск шегьерда кардик квай 5-нумрадин СМУ-дин баркаллу коллективдизни (руководитель — генеральный директор Фридун Магьарамович Шагьпазов) талукь я — вири йисара “Лезги газет” чпин кIвалериз къведайвал ийизва.

СМУ-дин коллективдал буьгьтенар вегьез, адан  сагьибрин геле къе­къвез­, крариз кьацI ягъиз алахъай башибузукьарни хьайиди чаз чида. А чIу­лаврилай  гьахъвал батмишариз алакьнач.

Гъилевай йис патал 20 экземпляр “Лезги газетар” кхьенва! Сагърай куьн! Баркалла квез! Къуй куь руьгьдин, рикIин къуватар мадни артух хьурай!

Сан артух хьуй кIвалерин!

Цуьк акъудрай чилери.

Гьар са кIвале бахтар хьуй

Чи убайрин, хуьрерин.

 

Вад лугьудай СМУ-дихъ,

Шив хуьдай хьиз хамудиз,

Агалкьунрин дуьнья хьуй,

Мешреб виниз акъудиз!

 

Буьгьтенар гьакI кур хьурай!

Квел Худадин нур хьурай! Амин.

“Лезги газетдин” редакциядин коллектив


Всего просмотров: 36
Подпишитесь на наши каналы:

Читайте также:


Новости партнеров