Аялрин бахча цIийи хъувуник пай кутада

Сулейман-Стальский райондин Юкьван Стlалрилай тир Пирмегьамед Балакеримова хайи хуьруьн аялрин бахча ремонт авунин карда куьмек гуда.

Райадминистрациядин пресс-къуллугъди «Лезги газетдиз» хабар гузвайвал, алай вахтунда Москвада яшамиш жезвай карчи П.Балакеримован куьмекдалди Юкьван Стlалрин аялрин бахчадин дакlарар дегишда ва са кьадар маса кlвалахарни кьилиз акъудда. Къейдна кlанда хьи, ихтилат физвай бахчадин дарамат зур асир идалай вилик кардик кутунай. Гьавиляй исятда ам алай девирдин истемишунриз жаваб гудай гьалда авач. Цlийи хъувунин кlвалахрин сергьятра аваз дараматдин патав гвай паркни хъсан гьалдиз хкида, исятда и кар патал пуд виш машин накьв гъанва.  Московский областдай гуьрчег тарарин къелемарни къачудайвал я. Ватандин Чlехи дяведа чан гайибур рикlел хуьниз талукь обелискни гуьнгуьна хутада. Малумарзавайвал, аялрин бахчадин дарамат ва парк цlийи хъувунин кlвалахар гатфарихъ акьалтlардайвал я.

Къейдзавайвал, вири и кlвалахар кьилиз акъудун 3 миллион манатдай акъвазда. Хуьруьн администрациядин кьил Селим Казимован гафарай, баркаллу ватанэгьли Пирмегьамед Балакеримова гележегдани хайи хуьруьз алакьдайвал куьмек гуз вич гьазур тирдакай лагьанва.

Сулейман-Стальский райондин кьил Нариман Абдулмуталибова ватандин абадвиликай фикирзавай Пирмегьамед Балакеримоваз чухсагъул малумарнава.

“Лезги газет”


Всего просмотров: 35

Читайте также: