Аялар шадарна

Са тIимил вахт идалай вилик Сулейман-Стальский райондин ЦIийи Испикрин хуьре фадлай пландик квай аялар къугъвадай майдан шад гьалара ачухна. Мярекатда райондин кьил Нариман Абдулмуталибова, депутатрин Собранидин председатель Штибег Мегьамедханова, общественный палатадин председатель Алимет Мейланова, хуьруьн поселенидин кьил Руслан Магьмудова, ЦIийи Испикрин юкьван мектебдин тешкилатчи ва муаллим Рамазан Къазанбегова, хуьруьнвийри иштиракна.

Испикрин хуьр са акьван чIехиди туштIани, ана, юкьван мектебдилай гъейри, кIвалах хъсандиз тамамарзавай культурадин кIвал (КДЦ), мектебдихъ галаз гьамиша санал мярекатар тухузвай ктабхана, гьакI медпункт кардик ква.

Райондай атанвай мугьманри испиквийриз аялар къугъвадай майдан ачухун тебрикна. Шад межлисдал ЦIийи Испикрин культурадин кIвалин директор Периханум Къазанбеговади, афгъанвийрин союздин председатель, Дагъустандин культурадин лайихлу работник Ислеман Ризаева, манидар Азим Ризаева халкьдин манияр тамамарна, школадин аялри шиирар кIелна ва кьуьлерна. Майдандал  къугъвазвай аялар иллаки шад тир.

Заз вири хуьруьнвийрин тIвар­цIихъай райондин кьил Нариман Шамсудиновичаз ва и кIвалахдик чпин пай кутур гьар са касдиз сагърай лугьуз кIанзава. Умудлу я хьи, хуьруьн амай месэлаярни — куьчейра къир цун, цIийи мектеб, аялрин ясли-бахча эцигун — райондин кьиле авай ксарин куьмекдалди гьялда.

 

Испик лугьур хуьр ава чахъ

Къацу чуьллер, тамар авай,

Машгьур хъенчIин къапар авай,

Емишар, бул багълар авай

Испик лугьур хуьр ава чахъ.

ГъвечIи-чIехи чпиз чидай,

Хатур-гьуьрмет пара кIандай,

Гъиляй вири крар къведай

Испик лугьур хуьр ава чахъ.

Жемиля Ризаева


Всего просмотров: 46
Подпишитесь на наши каналы:

Читайте также:


Новости партнеров