Арифдаррин тухумдиз бахшна

Алатай гьафтеда Махачкъалада, ­Расул Гьамзатован тIварунихъ галай Мил­ли библиотекада, республикада ва адалай къецени машгьур тир Алкадарскийрин тухумдиз бахшна, “Созвездие Алкадари”  документальный фильмдин презентация кьиле фена. Ана Сулейман-Стальский райондин кьил Нариман Абдулмуталибов ва адан заместителар кьиле аваз атанвай еке делегацияди, республикадин жавабдар къуллугърал алай ксари, массовый информациядин такьатрин, лезги интеллигенциядин векилри, студентри,  школайра кIелзавай аялри иштиракна.

Проектдин автор машгьур тележурналист Гулера Камилова я. Фильм  РАН-дин академик, философиядин илимрин доктор Абдусалам Гьуьсейнован — 80 ва Сулейман-Стальский райондин 90 йис тамам хьуниз бахшнава. Ам  гьазурунин теклиф гайиди Сулейман-Стальский райондин кьил Нариман Абдулмуталибов, спонсорвал авурди Имам Яралиеван “Умуд” тIвар алай мергьяматлувилин фонд я. Проектдин съёмкаяр Москвада, Махачкъалада, Дербентда, Кьасумхуьрел, Вини Алкьвадрал, ЦIийи Алкьвадрал ва куьгьне Хпуьхъа кьиле фена.

Фильм 45 декьикьада давам жезва. Ам тамашачийриз гзаф бегенмиш хьана. ЧIугунвай зегьметдай кIватI хьанвайбуру Гулера Камиловадиз сагърай лагьана. Авторди фильм арадал атуникай авур суьгьбетдай малум хьайивал, проектдал ада тамам 3 вацра кIвалахна.

— Документар, ктабар, архивра, рукописдин фондара материалар тупIалай авуна, Алкьвадар Гьасан эфендидин уьмуьрдин ва яратмишунрин рекьихъ, ирсинихъ галаз таниш хьайила,  зун гъавурда акьурвал,  Дагъларин уьлкведин тарихда чаз хабар авачир чинар гзаф ава. Гьикьван камаллу, бажарагълу, жуьрэтлу ксар яшамиш хьана Дагъустандин хуьрера! Абурухъ акьван зурба къуватар, мумкинвилер (потенциал) авай хьи, гьатта са шумуд несилар патални  девлетлу ирс туна. ИкI, Халикьдиз ибадат ийизни, илимдин рекьени бегьерлудаказ зегьмет чIугваз алакьна, — къейдна ада.

Мярекатдал фильм арадал гъунин  макьсаддикай, Алкадарскийрин тухумдин векилрин алакьунрикай, кьетIен бажарагъдикай рахайбурун, абуруз талукь яз  теклифар раиж авурбурун жергеда Сулейман-Стальский райондин кьил, проектдин соавтор, филологиядин илимрин кандидат Нариман Абдулмуталибовни ава. Ада проектдин автор Г.Камиловадиз сагърай лугьунихъ галаз санал фильмдиз са нефесдал алаз килигиз жезвайди, ам республикада ва вири россияда кьиле тухудай конкурсра иштиракуниз лайихлу тирди, хъсан нетижаярни къазанмишдайди къейдна.

— Алкадарскийрин тухум сад-ваъ, са шумуд фильм, проект арадал гъуниз ла­йихлу я. И баркаллу тухумди 20-далай виниз докторарни илимрин кандидатар, РАН-дин гьакъикъи член, Социализмдин Зегьметдин Игит, Ленинан, Дуствилин ор­денрин 6 кавалер  гана. Кьве гимидал Готфрид ва Генрих Гьасановрин — Алкьвадар Гьасан эфендидин хтулрин тIва­рар ала. Алкадарскийрин тухумда образованидин, хуьруьн майишатдин, медицинадин ва маса хилерай лайихлу тIва­рар къачунвай гзаф ксар ава. Зун Алкьвадар Гьасан эфендидин ватандай — Сулейман-Стальский райондай  хьунал за дамахзава. И тухумдин векилри район, Дагъустан ва Россия патал гьунарлу,  эбеди гел тунвай гзаф крар авуна, ийизма…, — алава хъувуна Нариман Шамсудиновича.

Мярекатдал РАН-дин ДНЦ-дин Гь.ЦIа­дасадин тIварунихъ галай чIалан, литературадин ва искусстводин институтдин къуллугъчи, филологиядин илим­рин доктор Мегьамед Мегьамедов, профессор, критик ва литературовед Гьажи Гашаров, РД-дин Халкьдин Соб­ранидин образованидин, илимдин, культурадин, жегьилрин крарин, спортдин ва туризмдин рекьяй Комитетдин председатель Гьамидуллагь Мегьамедов, Да­гъустан­дин милли политикадин ва диндин крарин рекьяй министр Энрик Муслимов, Ал­кьвадар Гьасан эфендидин тIва­­ру­нихъ галай музейдин директор Гьуьсейн Гьуьсейнов, мергьяматлувилин “Умуд” фондунин директор Савин Велиев, Алка­дарскийдин тухумдай тир Муминат хала ва масабурни рахана. Абу­ру фильм­дикай чпин фикирар ва теклифар раижна, ­Алкадарскийрин тухумдин векилрин лайихлувилер къейдна, проектдин автор­диз ва ам арадал гъиз куьмек гайи ксариз чухсагъул лагьана.

Эхирдай аялри хайи чIалалди шиирар кIелна.

Рагнеда Рамалданова


Всего просмотров: 64

Читайте также: