Академиквилин гьуьрметдин тIвар

Чи ватандашри жуьреба-жуьре рекьерай  агалкьунар къазанмишуникай хабарар агакьайла, чун, гьелбетда, шад жеда. ИкI, и мукьвара чак хайи халкьдин мад са векилдин агалкьунри дамах кутуна: январдин эхирра Москвада яшайишдин технологийрин илимрин ва чкадин самоуправленидин Академиядин Президиумдин заседанидал  Къазиев  Азим  Мегьамедалиевичаз,  яшайишдин хиле агьалийрин ихтиярар хуьдай пешекардиз, академиквилин гьуьрметдин тIвар гунин къарар кьабулна.

Исламдин  бизнесдин Международный Ассоциациядин (МАИБ) Президент ва Форумдин попечительский Советдин Председатель М.В.Кабаеванни ЮНЕСКО-дин къени ниятрин посол (посол Доброй воли) ва Форумдин центральный Советдин председатель А.В.Очировадин къулар алаз Россиядин Пенсийрин Фондунин (ПФР) Дагъустан Республикада авай отделенидин управляющий М.И.Исаеван тIварцIихъ рекье тунвай чарче ихьтин гафар кхьенва:

“Гьуьрметлу Мегьамед Исаевич!

МАИБ-ди ва “Россиядинни къецепатан уьлквейрин халкьар сад хьун: “Инсан-Общество-Государство”  тIвар алаз Ахцегьа­ кьиле фидай  международный форумдин (инлай кьулухъ — Форум) Центральный Советди Россиядинни къецепатан уьлквейрин государственный ва общественный  тешкилатрихъ галаз санал Чилел ислягьвал, миллетрин арада дуствал хуьн ва гьар са диндин азадвал кьабулун, гьакI ин­лай кьулухъни вири инсаниятдин руьгьдинни ахлакьдин  ивирар сад-садаз мукьва авун, мягькемарун ва  абур хуьн патал  еке кIвалах кьиле тухузва. И кардик еке пай кутазвай ксарин арада куь къуллугъчи -ПФР-дин  Мегьарамдхуьруьн районда авай отделенидин управленидин регьбер, асул кIвалахдивай азад вахтунда Ахцегьа Форум тешкилунин ва кьиле тухунин карда Мегьарамдхуьруьн райондин патай кIва­лахдин дестедин кьил Къазиев Азим Мегьамедалиевични ава.

Гьуьрметлу Мегьамед Исаевич!  Коллективдин регьбер яз, Квез ва Къазиев Азим Мегьамедалиевичаз Дагъустан Республикадин, чи уьлкведин ва дуьньядин абадвал патал гьакъисагъвилелди зегьмет чIугунай сагърай луьгьуз кIанзава”.

Чарче мадни кхьенвайвал, МАИБ-дин Пре­зидент ва Форумдин попечительский Советдин председатель М.Кабаеван, ЮНЕСКО-дин къени ниятрин посол, ЮНЕСКО-дин “Ипек­­дин рехъ”  Онлайн-Платформадин проектдин РФ-дин патай куратор, Форумдин центральный Советдин председатель А.В.Очиро­вадин тапшуругъдалди, Форумдин центральный Советдин сопредседатель, яша­йиш­дин технологийрин илимрин ва чкадин са­моуп­равленидин Академиядин вице-президент Р.З.Магьмудов кьиле аваз 2019-йисан­ декабр­диз Дагъустан Республикадиз фин па­тал кIва­лахдин десте арадал гъана. Деле­га­циядик ла­гьайтIа, РФ-дин Федеральный Соб­ранидин Госдумадин образованидин ва илимдин рекьяй­ Комитетдин патав гвай Экспертрин  советдин председателдин замести­тель, Форумдин экспертрин Советдин пред­седа­тель, профессор В.И.Патрушев, РФ-дин мил­ли хатасузвилин Агентст­водин регьбер, Форумдин ахтармишунинни ре­визиядин рекьяй комиссиядин председатель, Советрин Союздин Игит, генерал-лейтенант В.Н.Очиров, Форумдин правовой месэлайрай пешекар-консультант, РФ-дин Силисдин Комитетдин председателдин патав гвай лап важиблу­ крарай старший силисчи, генерал-майор М.В.­Туманов, “Российский газетдин” обозреватель, Форумдин пресс-къуллугъдин регь­бер­ И.А.Егоров, Форумдин IT-технологийрин рекьяй пешекар А.Б.Токарев квай. Абур кьабулзавай патан еринда — Форум тешкилуна ва кьиле тухуна Мегьарамдхуьруьн райондин­ патай кьиле Азим Къазиев авай кIвалах­дин десте.

Мугьман хьанвай делегациядин членри элкъвей столдин (тема: “Технологии правовой защиты населения в социальной сфере как основа социально-экономического развития Республики Дагестан”) иштиракчияр патал заседание тешкилуна А.М.Къазиеван пешекарвал ва атанвай ксарихъ галаз къе­къуь­нин, абур дагълух чкадихъ галаз танишарунин жигьетдай виниз тир дережа къейд­на. Элкъвей столдихъ республикадин тарихдинни медениятдин ирсинин памятникар хуьниз, абур ЮНЕСКО-дин ирсинин сиягьдик кутуниз ва “Ипекдин ЧIехи рехъ ва Ахцегьрин чкадин агьалийри кутунвай Посолрин Ре­кьер” международный программадиз талукь месэлаярни веревирдна.

Са шумуд югъ идалай вилик чаз яшайиш­дин технологийрин илимрин ва чкадин са­мо­управленидин Академиядин вице-президент Рамидин Магьмудовахъ ва академиквилин тIварцIиз лайихлу хьанвай Азим Къазиевахъ галаз суьгьбетдай мумкинвални хьана. Абурун суьгьбетрай малум хьайивал, Форумдиз гьазурвилер 2015-йисалай аквазва. Ам цIи зулухъ кьиле ту­хун пландик ква. Аниз дуьньядин 75 уьлкведай саки 1000-дав агакь­на иштиракчияр атун гуьз­лемишзава.

— Алатнавай йисара жуьреба-жуьре темайрай элкъвей столар кьиле тухванва. Исятда лагьайтIа, дуьньядин 75 уьлкведихъ галаз­ и Форумда иштиракуниз ва санал кIвала­хуниз талукь месэлаяр гьялзава. Кьилди къа­чуртIа, Форум кьиле тухун патал РФ-дин къецепатан­ крарин, гьакIни культурадин министерствойривай, Президентдин Аппаратдивай разивал къачунва.

Форумдин кьилин макьсад чи республикадин   тIвар хъсан патахъай раижун, культурадин ирсинин къайгъударвал авун, ам хуьн, чи милли культурадихъ, халкьдин ацукьун-къарагъунихъ галаз танишарун (ва икI мад) я. Гьелелиг кьве объект — Ахцегьрин къеле ва мискIин ЮНЕСКО-дин ирсинин сиягьдик кутаз чалишмишвалзава, — къейдна чпин рахунра А.Къазиева ва Р.Магьмудова.

Азим Мегьамедалиевичаз чна академиквилин гьуьрметдин тIвар тебрик авунихъ галаз сад хьиз, гъиле кьунвай кIвалахда еке агалкьунар хьун — Форум вичин мана-метлебдихъ агакьун  алхишзава.

Рагнеда  Рамалданова


Всего просмотров: 186
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире