Ахцегьа — “Крымдин ва Кавказдин рагъ”

Искусство — им гьакъикъат къаматралди, айгьамдалди къалурунин ва илимдихъ галаз санал дуьнья-алем чи­рунин кьетIен жуьре я. Ада инсанар сад ва мергьяматлу ийизва, абуруз шадвал, гуьзелвал гузва. Са тIимил йи­къар идалай вилик Ахцегьа, Къияс Межидован тIварунихъ галай аялрин  яратмишунрин кIвалин (ДДТ) изобразительный искусстводин студиядин галереяда­ Карачаево-Черкесия Республикадин ла­йихлу художник, РФ-дин художникрин ва дизайнеррин Союзрин член  Гьажиев  Мегьамедзериф  Гьажиевичан  яратмишунрин выставка хьана.

Мегьамедзериф Гьажиев

Художник ва адан яратмишунрал рикI алаз кIватI хьанвайбур тебрикуналди, шикилрин “Крымдин ва Кавказдин рагъ” выставка яратмишунрин кIвалин за­вуч Абдулжалил  Жалилова ачухна­.

— Чи баркаллу ватанэгьли Мегьамедзериф Гьажиева, Кеферпатан ­Кавказдин вири республикайрин меркезра авторвилин выставкаяр ачухай бажарагълу художникди, пешекар художниквилинни педагогвилин сифте камар ина, Аскар Сарыджадин тIвару­нихъ галай худшколада къачунатIани, адан яратмишунар чаз Ахцегьа сифте яз къалурзава.

Ахпа художникдикайни адан выс­тавкадикай чпин фикирар гзафбуру ла­гьана.­

Энвер Асалиев, ДДТ-да ИЗО сту­дия­дин муаллим, РД-дин культурадин лайихлу работник: — 1980-йисара Ахцегьрин худшколада Мегьамедзериф стхадихъ галаз чна санал кIвалахна. Заз ам вичин кьетIен хатI авай  художник хьиз чида. Гуьгъуьнлай, 30 йисалайни артух девирда Карачаево-Черкесияда девлетлу тежриба кIватIна, халис худож­ник­вилин дережаяр къазанмишна. Ватандиз хтун чна тебрикзава. Мад санал кIвалахиз, цIийи несилдин художникар тербияламишда..

Тамила  Аллагьвердиева, аялрин яратмишунрин кIвалин директор: — Яратмишунрин чи коллективдиз машгьур художник, лайихлу муаллим хтунал чна шадвалзава. Къуй адахъ мадни еке агал­кьунар хьурай!

Малик  Мирзоев, Ахцегьрин 2-нумрадин юкьван чирвилерин мектебдин завуч-тешкилатчи, художник: — Мегьамедзериф ватандиз хкана, адаз ина вичин алакьунар ишлемишдай мумкинвал ганвай райондин кьил  Осман Абдулкеримов сагърай! Адан кIвачихъ гила Ахцегьрин художественный школадални чан хкведайдахъ чун инанмиш я. Художникдин кIвалахар лагьайтIа, рангунин ширералдини акварелралди чIугунвай пейзажарни этюдар лап вини дережадин ус­тадвилинбур я. Жегьил художникар патал абур вижевай чешнеяр я.

Эльбрус  Алиев, райондин культурадин управленидин къуллугъчи: — Са вахтунда зани гьа и школада Мегьамедзериф, Энвер ва Малик муаллимрин гъилик кIелна. Зун искусстводиз шерик авурбурни гьабур я. Пара сагърай! Мегьамедзериф муаллимди чаз спортдин, музыкадин, гьакI яшайишдин рекьяйни тарсар-тербия ганай.

Мегьамедзериф Гьажиеваз хайи югъ, художественный яратмишунрин выставка мубаракунин хуш келимаяр гьакI Ахцегь, Докъузпара ва Рутул районрин ур­тах РВК-дин комиссар Рафик Мегьамедова, Дербентдин педколледждин муаллим, художникдин дуст Билал Жа­фа­рова, райондин культурадин управленидин художник Камил Ше­рифалиева, гьевескар эколог ва фотокорреспондент Юсиф Саркарова, и цIа-ра­рин авторди ва масабуруни лагьана. Мя­рекат аялрин “Солнышко” бахчадин би­цIек­ри (тербия­чи  — Айида Агъаева) мадни гуьрчегарна­.

Мегьамедзериф Гьажиева суьгьбет авурвал, ам хизанни галаз 31 йисуз Карачаево-Черкесияда яшамиш хьана. Ке­ферпатан Кавказда къекъуьн тавур чка амач. Москвадин, Санкт-Петербургдин, Париждин ва искусстводин маса меркезрин музейрани шикилрин выставкайра машгьур пара ядигаррихъни абурун авторрихъ галаз таниш хьана, выставкайра иштиракна. КIватIай чирвилер, теж­риба гваз  гила хайи ватандиз хтанва. Буш гъилеривдини ваъ. “Крымдин ва Кавказдин рагъ” выставкадин шикилар Крымда, Осетияда, Ингушетияда яратмишунрин сиягьатра яратмишна. Гила къаст Ахцегьа художественно-изобразительный искусство кIвачел ахкьалдарун я. Машгьур Аскар Сарыджа, Шариф Шагьмарданов, Гьажимурад Шугаев, Имамали Халилов, Дарвин Велибегов хьтин зурба художникар акъатнавай ина абурун рехъ-кар давамардай бажарагълу жегьилар мадни жедайдахъ чун инанмиш я…

Дашдемир Шерифалиев


Всего просмотров: 104
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире