Адан женгерин рехъ

Вичин ери-бине Испикрин  хуьряй тир, гзаф йисара хизанни галаз Кьасумхуьрел яшамиш хьайи Ватандин ЧIехи дяведин ­иштиракчи, запасда авай капитан Абдусемед Гьабибулаев заз хъсандиз чидай. Ада райондин “Коммунизмдин гатфар” газетдин редакцияда культурадинни яша­йишдин отделдин заведующийвиле кIвалахза­вай. Тежрибалу жур­налистди школада кIелзавай заз мухбирвиле сифте камар къачунин рекьяй меслятар,  куьмек ганай.

Педучилище акьалтIарай же­гьил­ди вичин зегьметдин рехъ Испикрин школада муаллимвилелай башламишна. 1939-йисуз А.Гьабибулаеваз армиядин жергейриз эвер гана. Ада финнрихъ галаз хьайи дяведа иштиракна. Ватандин ЧIехи дяве башламиш хьайи сифте йи­къа­рилай А.Гьа­бибулаев эхирдалди  фронтда хьана.

1941-йисуз Абдусемеда Прибалтийский военный округда ин­женервилин рекьяй офицерар гьазурдай курсар куьтягьна. Ам 237-стрелковый дивизиядин 367-саперрин батальондин командирдин заместителвиле тайинарна.

— Зун батальондиз атай пуд лагьай йикъан экуьнахъ немсерин танкарини самолетри чи диви­зиядин сенгеррал къати гьужум авуна. Тамун гапIалдикай хкечIна, чи сенгеррал къвезвай кIвенкIве авай пуд танкунай гум акъатна, абур гьа алай чкадал элкъвена. Им зи буйругъдалди патав гвай блин­дажда эцигнавай 76 миллиметрдин тупарин батареядин тупчийри кьилиз акъудай гьунар тир… Чна танкар, пехота къведай вири сенгерар, минаяр кутуна, цацар алай симер чIу­гуна, мягькемарнавай… Са шумуд сятда дяве тухвайдалай гуьгъуьниз чи дивизия гьужумдиз фе­на, — кхьенва рагьметлуда рикIел хкунра.

1943-йисан мартдиз Саратовдин областдин Аткарск шегьерда командиррин заместителар гьазурдай курсар куьтягьай А.Гьабибулаев Воронежский фронтдин 40-армиядин резервдиз ракъурна.

-1943-йисан апрелдин вацра чи дивизиядин вилик, Кеферпатан Буг вацIалай элячIна, адан эрчIи пата авай Прохоровка хуьр азад авунин ва плацдарм гегьеншарунин ве­зифа эцигна, — кхьизва А.Гьабибу­лае­ва ви­чин рикIел хкунра. — ВацIа­лай эля­чIун четин тир, луьтквеяр бес жезва­чир. Чна кIарас­рикай, тахтайрикай плотар туькIуьрна, авай луьт­квеяр къайдадик кутуна. Йифен кьулариз чна 841-полк ва­цIун а па­таз­ акъудна. Югъ жедай кьиляй хуь­­ряй катиз та­хьана амукьай немсери рей гуз баш­ламишна. 40 автомашин, хейлин фургъунар, тупар, пулеметар, 300-далай виниз аскерар ва офицерар чна есирда кьуна. Чи дивизияди Рагъ­акIидай патахъ гьужум авун давамарна.

И викIегьвиляй старший лейтенант А.Гьабибулаеваз Ватандин дяведин 2-дережадин орден гана.

1944-йисуз РагъакIидай патан Украина азад авун патал чи кьушунри Карпатдин дагъларай Чехословакиядин сергьятриз экъечIунин мураддалди гьужумзавай. А.Гьабибулаев авай 237-дивизиядин саперрин батальондин вилик тупар, минометар, абурун суьрсет авай машинриз дагъдин жигъирдай рехъ туькIуьрна, Карпатдин лап кьакьан чкадал акъудиз куьмек гунин везифа эцигна. Дагълара кьиле фейи са женгина дивизияди душмандин 450 аскер есирвиле кьуна, 225 автомашин, хейлин тупар къакъудна, чи армиядиз виликди гьужумдиз фидай рехъ ачухна.

Чоп, Кощица, Мукачев ва маса шегьерар азад хъийидайлани    А.Гьа­бибулаева кьегьалвилер къалурна.

Ротадин ва гуьгъуьнлай батальондин командир хьайи капитан А.Гьабибулаева, Псел, Удай, Днепр вацIарилай элячIдайла, Станистав шегьердин патарив ва 1945-йисан 9-майдиз Берлинда Бичеву вацIал алай муьгъ къачун патал кьиле фейи женгера къалурай кьегьалвилерикай РФ-дин оборонадин министерстводин “Подвиг народа” сайтдани кхьенва.

Хурудал Ватандин дяведин 1 ва 2-дережайрин, Яру Гъед орденар ва гзаф кьадар медалар алаз хтай А.Гьабибулаева Испикрин школада муаллимвиле, райондин идарайра жуьреба-жуьре къуллугърал кIвалахна, 15 йисалай виниз  журналиствилизни бахшна.

КьетIен хатI авай журналист Абдусемед Гьабибулаеван гъиликай гзаф кьадар метлеблу макъалаяр, очеркар, фельетонар хкатна.

А.Гьабибулаев 1986-йисуз рагьметдиз фена. Чидайбурун, багърийрин  рикIелай ам алатдач.

Хазран  Кьасумов


Всего просмотров: 72
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире