20 гими машгъул жеда

Дагъустанда 2019-йисуз эхиримжи 30 йисан вахтунда садрани та­хьай кьван  кьадар балугъар кьунва, ха­бар гузва Росрыболовстводин Кеферпатан Кавказдин мулкунин управленидин пресс-къуллугъди.

Алатай йисан нетижайралди, Да­­гъустанди кьунвай балугърин кьа­­­дар 10 агъзур тонндиз барабар я.

“Дагъустандин балугъчийри Каспий гьуьляй  2019-йисуз  10030 тонн балугъар кьуна. Виридалайни гзаф кьунвайбурук кIезри хьтин бицIи балугъар (килька), кефаль, сазан, красноперка ва сельд акатзава. Эхиримжи 30 йисан вахтунда им виридалайни гзаф кьадар я. Анжах алатай йисав гекъигайла, кьунвай балугърин кьадар 30 процентдин гзаф хьанва. Эхиримжи 10 йисан вахтунда церай кьазвай  биоресурсрин кьадар пуд сеферда, я тахьай­тIа, тахминан 300 процентдин гзаф хьанва”, — лагьана пресс-къуллугъдин векилди.

Адан гафаралди, балугъар кьунин кардик йигинвал акатунин себебрикай сад Каспийдал балу­гърин ветегайриз талукь сад тир  майдан тешкилун я. “Гила ОДУ-дик (ихтияр ганвай санлай къачур­ ­кьадар — ред.) акат тийизвай жуьрейрин ба­лугъар кьазвайбурухъ тайин тир ве­тегаяр хьун чарасуз туш. Карханади  Росрыболовст­во­дин Кеферпатан Кавказдин мул­кунин управленидихъ галаз икьрар кутIунун бес жезва, адан бине­даллаз абуруз ба­лугъар кьадай их­тияр гузва”, — къейдна идарадин векилди.

Малум хьайивал, и хилен ба­зардиз балугъар кьунал машгъул цIийи 20 компания атанва. Икьван чIа­валди абуру Каспий гьуьлел кIва­­­лахзавачир.  Региондиз гьакIни Краснодардин крайдай ва уьл­кведин центральный регионрай  тир маса лап чIехи компаниярни ­атанва.

“Кьазвай балугърин кьадар ­артухарунин бине килькадиз талукь экспедицийрикай хьана. Абуру гьуьле и жуьредин балугърин гьа­къикъи кьадар тайинариз куьмек гана. ИкI, КаспНИРХ-дин Да­гъус­тан­дин филиалдин делилралди, гьар йисуз Каспий гьуьляй, цин биоресурсриз зиян тагана, 95 агъзур тонн килька кьаз жезва. Им и жуьредин балугърин запасрин санлай къачур кьадардин 14 процентдиз барабар делил я”, — лугьузва пресс-къуллугъдай.

Идалай вилик хабар гайивал,  республикадин тIебиат хуьнин ва экологиядин министерстводин  делилралди, алукьнавай 2020-йисуз Дагъустанда  килька кьунал 20 ги­ми машгъул жеда. Къейд ийин, Да­гъустанда эхиримжи 20 йисан вахтунда килька балугъар пешекарвилелди кьунин кIвалах михьиз акъвазарнавай. И кардин себеб гьуьле ихьтин кIезрийрин кьадар лап тIи­мил хьун тир.

«Лезги газет»


Всего просмотров: 65
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире