120 йис къейдна

25 октябрдиз  Дербентдин вок­залдик квай ракьун рекьерин тарихдин музейда шегьердиз сифте поезд атайдалай инихъ 120 йис та­мам­­ хьу­низ талукьарнавай мярекат кьиле фена. Аниз ракьун рекьин къуллугъчияр, ветеранар, Дербентдин ракьун рекьин колледждин студентар, шегьерэгьлияр атанвай. 

Музейдин директор, Кеферпатан Кавказдин ракьун рекьерин  гьуьрметлу къуллугъчи Гажиагъа Ме­гьамедшерифова, шегьердин  Собранидин депутат, РФ-дин ракьун­ рекьерин  гьуьрметлу работник Николай Алчиева, ветеран-машинист, Архангельский областдин транспортдин лайихлу къуллугъчи Юрий Момотова, СССР-дин ракьун ре­кье­рин гьуьрметлу работник Анвер Загьирова, Дербент шегьердин  кьилин музейдин илимдин къуллугъчи Вели Юсуфова ва масабуру шегьердин ва Кьиблепатан Дагъустандин агьалийрин игьтияжриз ракьун рекьери 120 йисуз ийизвай важиблу къуллугъдикай лагьана.

И мярекатдал шегьердин администрациядин культурадин, спортдин, туризмадин ва жегьилрин поли­тикадин управленидин кьилин къуллугъчи Гуьлпери Мирзабалаевади ра­кьун рекьин са жерге къуллугъчийрив  гьуьрметдин грамотаяр вахкана­. Абурун арада  ракьун рекьин ветеран Гуьлмет Гуьлметов, Дербентдин ракьун рекьин вокзалдин начальник Аслан Рагьимханов, и вокзалди­к пасажирар къведайла, абур ахтармишзавай чкадин кьилин пешекар Владимир Амаханов ва ма­сабур авай.

РикIел хкин: 1898-йисан 25-сентябрдиз йикъан  сятдин кьведаз къад декьикьа кIвалахайла, Порт-Петровскдай, цIийиз тухванвай 123 км рекьяй, вичел транспорантар алай, пассажирар тухудай ва­­гонар галай сад лагьай поезд Дербент станциядал атана. Поезд агьалийри, шегьердин вилик-кьилик квай ксари,  военный духовой оркестрди къаршиламишнай. Поезд атайдалай кьулухъ шегьердин кавхади багьа мугьманар (абурун арада Дагъустандин областдин губернатор, князь Барятинскийни авай)  хушвилелди къаршиламишна ва гуь­гъуьнлай 150 касдиз шегьердин правленида берекатлу суфраяр ачухнай.

Сифте поезд – паровоздин маши­нист Антон Тиевский тир. Чна Яро­славль  шегьерда яшамиш жезвай адан  штул  Дмитрий Тиевскийдихъ га­лаз алакъаяр къени хуьзва.

Мярекатдал колледждин художественный группадик квай Ренат Шариева, Мугьаммад  Ханалиева, иер сес ва гележег авай лезги ашукь Ки­раза, манияр лагьана, кьуьлерна, ше­гьердин  15-нумрадин школа­дин 2-классдин ученица Фатима  На­ме­туллаевади  ракьун рекьериз талукь шиирар кIелна, баркалла чпиз.

Чи мухбир


Всего просмотров: 45

Читайте также: