Эсед Салигьован гьуьрметдай

И йикъара Кьурагь райондин КIи­рийрин хуьре, Советрин Союздин Игит Эсед Салигьован экуь къаматдиз бахш­на, 46-сеферда волейболдай республикадин турнир кьиле тухвана. Сят­дин 9-дан зураз КIирийрин юкьван школадин гьаятда райондин тешкилатрин ва идарайрин кьиле авай ксар, хуьрерин кьилер, КIирийрин юкьван школадин, школа-интернатдин ва Кье­пIиррин юкьван школадин аялринни муаллимрин коллективар, маса районрайни мугьманар кIватI хьанвай. КIи­рийрин юкьван школадин директор Фар­ман Шихкеримова ва адан заместитель Абдурагьим Исмаилова муаллимрин коллективдин патай Советрин Союздин Игит Эсед Салигьован памятникдал цуьквер эцигна. Сятдин 9 тамам хьайила, демонстрациядин иштиракчийрин  дестеяр Советрин Союздин Игитрин ва дяведа телеф хьайи мукьва-кьилийрин шикилар, плакатар, лозунгар гваз  Игитдин памятник алай хуьруьн центрадихъ ахмиш хьана.  Рекье абур дявейра телеф  хьанвай аскерриз-кIиривийриз хкажнавай обелискдин патав акъвазна. Кьурагь райондин къайдаяр хуьдай органрин ва яракьлу къуватрин, зегьметдин, дяведин ветеранрин советдин председатель Фахрудин Мирзоевани райондин образованидин отделдин начальник Рамазан Катибова обелискдал цуьквер эцигна. Ахпа иштиракчийрин дестейри Гъалибвилин паркунихъ рехъ давамар хъувуна.

Эсед Салигьован памятникдин патав митинг хьана. РФ-дин Гимн яна ва са декьикьада кисна акъвазна. Гуьгъуьнлай КIирийрин юкьван школадин ОБЖ-дин муаллим Эльмар Медетова Игитдин уьмуьрдин рекьикай ва кьегьалвилерикай суьгьбетна. Райадминистрациядин тIварцIихъай иштиракчияр райондин кьилин заместитель Махач Хариева тебрикна.

— Фашистрин Германиядиз вири дуьнья пацук кутаз кIан хьана. Вири Ев­ропа лукIвилик кутурдалай гуь-гъуь­низ 1941-йисан 22-июндиз Советрин Союздал гьужумна. Дяве башламишай сифте йикъалай вири Ватан хуьн патал къарагъна. Гзафбур гуьгьуьллувилелди фронтдиз фена. Да­гъустанвиярни кьулухъ акъвазнач. Кьурагь райондай фронтдиз 5 агъ­зурдав агакьна кьегьалар фена, абурукай гзафбуру дирибашвал къа­лурна. Алиев Араз Къазимегьаме­довични Салигьов Эсед Бабастанович Советрин Со­юздин Игит лагьай тIварцIиз лайихлу хьана. Чи виридан везифа игитрин кьегьалвилерикай ­несилрилай несилрал агакьарун, гьамиша рикIера хуьн я, — къейдна М.Хариева.

Мугьманрин тIварцIихъай тебрикдин гафар акъажунрин судья Мегьамед Курамегьамедовани лагьана. КIирийрин юкьван школадин ва ясли-бахчадин аялри Ватандин ЧIехи дяведин Игитриз бахшнавай шиирар кIелна.

Кьурагь райондин кьил Замир Азизова, адан заместитель Махач Хариева, КПРФ-дин райондин комитетди ва КIирийрин юкьван школадин коллективди Игитдин памятникдал цуьквер эцигна.

Республикадин дережадин турнирда Ахцегь, Гумбет, Ботлих, Кьурагь, Унцукул, Хунзах ва Шамил районрай атанвай хкянавай виридалайни викIегь командайри иштиракна. Пишкешрин фонд 300 агъзур манатдикай ибарат тир.

Мегьамед Курамегьамедован регьбервилик квай судьяйрин коллегияди 1-чка Хунзах райондин командадиз гун кьетIна. 2-чкадиз — Кьурагь ва 3-чкадизни Гумбет районрин командаяр лайихлу хьана.

КIвенкIвечи чкаяр кьур виридаз турнирдин пишкешрин фондунай, гьакI  райондин кьил З.Азизован патай къиметлу пишкешар гана. 1-чка кьур команда Советрин Союздин Игит рикIел хкунин Кубокдизни ла­йихлу хьана. Приздин чкаяр кьун тавур командайризни грамотаяр ва рикIел аламукьдай пишкешар гана.

Маида Агьмедова


Всего просмотров: 18

Читайте также: