Намуслу зегьметдай

Сулейман-Стальский райондин кьил Нариман Абдулмуталибова мукьвара культурадин хиле намуслудаказ зегьмет чIугвазвай са шумуд касдив райондин гьуьрметдин грамотаяр ва чухса­гъул­дин чарар вахкана. Абурун арада районда кардик квай Россиядин халкьдин адетрин культурадин И.Гь.Тагьирован тIвару­нихъ галай Центрадин Сардархуьруьн филиалдин заведующий  Фаиза  Халиловна  Балихановани  авай. Адаз ганвай Чухсагъулдин чарчел кхьенвайвал, ихьтин гьуьрметдиз ам яргъал йисарин зегьметдай, культура вилик тухуник еке пай кутунай лайихлу хьанва.

Чун Фаиза Балихановадихъ галаз мукьувай таниш хьана. Малум хьайивал, гьеле школада кIелзавай йисара ада вичин алакьунар районда тухвай культурадинни шадвилерин мярекатра, абурун жергедай яз школьникрин арада тухвай “Чна бажарагълубур жагъурзава” конкурсдани къалурнай.

2005-йисуз Махачкъалада Дагъустандин культурадин колледж акьалтIа­рай Ф.Балихановади сардархуьруьн-вийриз культурадин рекьяй къуллугъиз саки 15 йис я. Тежрибалу культработник кьиле акъвазнавай филиалдин кIвалах­ни и йисара хейлин хъсан хьанва. Ана са шумуд кружок кардик ква, аквадай аги­тациядин такьатриз гегьенш чка ганва­.

Вич хъсан манидар тир Ф. Балихановади филиалда 10 касдикай ибарат яз гьевескар артистрин хъсан коллектив тешкилнава. Ада районда тухузвай шадвилин мярекатра, фестивалра, килигунра иштиракзава, анра кIвенкIвечи чкаяр кьазва.

— Фаиза Халиловна районда хъсан культработникрикай сад я, — лугьузва райондин культурадин отделдин начальник Майрудин Бабаханова. — Вичин хиве авай асул везифаяр намуслудаказ кьилиз акъу­дунихъ галаз санал, ада райондин культурадин дворецда кардик квай хордин кIвалахдани активнидаказ  иштиракзава. Чун адалай гзаф рази я.

Ф.Балихановадин яргъал йисарин намуслу зегьмет 10-далай виниз грамотайралди, дипломралди, къиметлу пишкешралди къейднава.

— Халкьдин къуллугъда акъвазун, агьа­лийрин руьгьдин игьтияжар таъминарун — им зун патал виридалайни чIехи награда я, — лугьузва Фаиза Балихановади.

Хазран Кьасумов


Всего просмотров: 50

Читайте также: