Проектар — уьмуьрдиз
Социальный, экономикадин ва маса рекьерай йисалай-суз вилик физвай, республикада вилик жергейра авай муниципалитетрикай сад тир СтIал Сулейманан район эхиримжи 10-15 йисан къене эцигунрин халис майдандиз элкъвенва лагьайтIа, зун ягъалмиш жедач. Заз акI я хьи, вичин девирда Алибег Фатагьова кхьей “Эцигзава, эцигзава, куьгьнеди чукIур хъийиз, цIийи хъийиз, эхцигзава” гафар чи райондиз, ана къенин юкъуз кьиле тухузвай эцигунрин ва капитальный ремонтрин кIвалахриз бахшнава.
Район, адан хуьрер, общественный мулкар дуьзмиш ва авадан хьуниз муниципалитетда федеральный, региондин ва чкадин проектар уьмуьрдиз кечирмишуни екез куьмекзава.
Къенин юкъуз и проектрай тухванвай ва ийизвай кIвалахрикай суьгьбет авун патал чун райадминистрациядин капитальный эцигунрин управленидин начальник Роберт Лазимович Мейлановахъ галаз гуьруьшмиш хьана. Гуьгъуьнлай эцигзавай ва ремонтрин кIвалахар кьиле тухузвай са шумуд объектдал фена.
— Район йисалай-суз чIехи жезва. И кар себеб яз, эцигзавай ва капитальный ремонтрин кIвалахар кьиле тухузвай объектрин кьадарни гзаф я, — лугьузва Роберт Мейланова. — И рекьерай районди федеральный ва республикадин программайрани проектра иштиракзава. И жигьетдай райондин кьил Саид Темирханова еке кIвалах тухузва. Тамамарзавай кIвалахрал ва абур вахтунда кьилиз акъудунал райондин кьили кьетIен гуьзчивал тухузва. Идан нетижа яз, хъсанвилихъ еке дегишвилерни кьиле физва.
Проектрай тамамарнавай ва кьилиз акъудиз гъиле авай объектрикай рахайтIа, “Формирование комфортной городской среды” федеральный проектдай, конкурсдин къайдадин кIвалахар акьалтIаруналди, алай вахтунда Кьасумхуьрел Мира куьчеда аллея ва Агъа СтIал-Къазмайрал Шоссейная куьчеда сквер (гъвечIи багъ) туькIуьрунин кIвалахар кьиле тухузва. Абурал подряддин “Стройтехинвест” ООО ва Таймазханован ИП машгъул я. И кьве проектдиз 14 947 134 манат пул харж авун фикирдиз къачунва.
“Местные инициативы” проектдай Кьасумхуьрел Чернышевский куьчеда “РикIера хуьнин сквердин” ва Мира куьчеда аллеядин объектрал подряддин организация тир “Миленастрой” ООО-ди эцигунрин кIвалахар кьиле тухузва. И кьве проектдиз 3858710 манат пул кутунва.
“Регион для молодых” жегьилрин политика вилик тухунин комплексный программадай райондин агьалийриз яшайишдин рекьяй къуллугъзавай комбинатдин (КБО-дин) дараматдал подряддин “Строймедсервис” ООО-ди ремонтрин кIвалахар кьиле тухузва. Хейлин кIвалахар кьилиз акъуднава.
Районда Дагъустан Республикадин туризмдин министерстводин «Местные инициативы» проектдай общественный кьве мулк — Кьулан СтIалдал — «Пуд булахар» ва Герейханован хуьре «СтIал Сулейманан сквер» дуьзмишзава. И кIвалахрай икьрарар подряддин организацияр тир «Ремсервис» ва «ГРЭМ» ООО-рихъ галаз кутIуннава. И кьве проектдиз 7 753 360 манат пул кутунва.
«Мой Дагестан — мои дороги»» проектдай СВО-дин иштиракчийрин хизанар яшамиш жезвай Алкьвадрал, Агъа СтIалдал, Герейханован хуьре, ЦIийи Макьарал, Эминхуьре куьчейра къир цун патал икьрарар кутIуннава. Анриз 27 421 951 манат пул чара авунва. Идакай 8 113 679 манат ишлемишнава. Алай вахтунда ЦIийи Макьарал ва Эминхуьре СВО-дин иштиракчияр яшамиш жезвай куьчейра къир цунин кIвалахар кьиле тухузва.
Райондин УКС-дин начальник Роберт Мейлановавай чна муниципалитетдин бюджетдин гьисабдай тамамарзавай эцигунрин ва ремонтрин кIвалахрикайни лугьун тIалабна. Ада лагьайвал, чкадин бюджетдин такьатрин гьисабдай Асалдхуьре ФАП-дин патав гвай чкаяр дуьзмишунин кIвалахар тамамарзава.
Кьасумхуьрел культурадин дворецдин санузел ремонтна акьалтIарнава,.
СтIал Сулейманан музейдин вилик квай ва «Урус муаллимрин» статуяяр эцигнавай кьакьан пунарни (постаментар) ремонт хъувунва, Сардархуьре Б. Султангьамидан куьчеда газопроводдин линия ремонт хъийизва.
Кьасумхуьрел, Алкьвадрал, Эмин- хуьре, Чуьхверхуьрел, Курхуьрел, Зизика ва КIварчагъа умуми образованидин организацийрин вилик квай инсанар элячIдай чкаяр туькIуьрна, къайдадиз гъана акьалтIарнава.
Районда са шумуд объектдал ремонтринни эцигунрин кIвалахар кьиле тухун давамарзава. ИкI, Зизикрин юкьван школада ремонтрин кIвалахар кьиле тухун патал «Медсервис» ООО-дихъ, Вини СтIалдал газдин линийрин чIуру гьалда авай участокда ремонтрин кIвалахар тухун патал «Магстрой» ООО-дихъ галаз икьрарар кутIуннава.
«Кьасумхуьр — Агъа СтIал» автомобилрин рекье капитальный ремонтрин кIвалахар давамарзава.
— Рехъ физвай касди атIуда, — лагьана суьгьбетдин эхирдай Роберт Мейланова. — Умуд кутаз кIанзава хьи, эцигунрин хиле проектар кьилиз акъудуни район, адан хуьрер, жемиятдин мулкар мадни авадан ийида.
Хазран Кьасумов
