Октябрдин вацра, вири уьлкведа хьиз, Дагъустандани зулун призыв гатIунда ва ам декабрдин эхирдалди давам жеда. И йикъара Сергей Меликован регьбервилик кваз Махачкъалада кьиле фейи Оперштабдин заседанидал республика и важиблу серенжемдиз гьазур хьунин месэлаяр веревирдна.

Региондин Кьили къейд авурвал, военный комиссарри, муниципалитетрин кьилери ва СМИ-ри санал тухвай кIвалахдин нетижада Дагъустанда гатфарин призыв хъсан гьалара кьиле фена.

«Зулун призывни гьа ихьтин дережада аваз тешкилна кIанда», — лагьана С. Меликова.

Призывдиз гьазур хьунин жигьетдай кьиле тухузвай мярекатрикай гегьеншдиз­ РД-дин военкомдин везифаяр вахтуналди­ тамамарзавай Абдурагьман Мурадханова суьгьбет авуна. Адан гафарай малум хьайи­вал, армиядин жергейра къуллугъ авун патал эвер гудайбурун сиягьар туькIуьрна акьалтIарнава, алай вахтунда абуруз воен­ный комиссариатриз атун па­тал повестка­яр ре­кье твазва. Идалай гъейри, респуб­ли­кадин агьалияр­ ар­миядиз рекье твадай сборный пункт алай вахтунда герек вири затIаралди таъминарзава.

А.Мурадханова гьакI­­ни хабар гайивал­, республикадин во­ен­ный комиссариатдин ве­­­килри, муниципали­тетриз физ, чкайрал­ при­зывдиз гьазур хьун гьихьтин гьалара кьиле­ физватIа чирзава, герек тир куьмекар гузва.

Къейд ийин хьи, призывдин сергьятра аваз, армиядин жергейра къуллугъ авун патал 2006-1994-йисара дидедиз хьайи жегьилриз эверда. Призывникар СВО-да иштиракунал желбдач.

Агьмед  Магьмудов