ЦIийи ктабар

Мукьвара Кьасумхуьрел кардик квай «Куьредин ярар» культурадин центрада тIвар-ван авай лезги шаир СтIал Мислиматан (Мислимат Агьмедпашаевадин) 100 йис тамам хьуниз талукьарнавай цIийи ктаб — «СтIал Мислимат: уьмуьрдин ва яратмишунрин рехъ» — чапдай акъатна. 122 чиникай ибарат адан автор филологиядин илимрин доктор, Дагъустандин халкьдин писатель Къурбан Акимов я.

Ктабдин 1-кьиле кхьенва: «СтIал Мислимат 1924-йисан 1-июлдиз дуьньядиз атана ва 2021-йисан 5-декабрдиз, вичи кхьей шиирринни храй халичайрин хважамжамдин хьтин зурба зул туна, хъфена». Экуь дуьньядал 97 йисуз яшамиш хьайи СтIал Мислимата вичелай гуьгъуьниз кIелзавайбуруз вишералди гуьзел эсерар-шиирар туна. Адан къелемдикай «Дуьнья я ман…», «КIела, азиз балаяр!», «Зи дуьнья», «Шиирар» тIварар алай яцIу ктабар хкатна.

СтIал Мислимат халичайрин­ зурба устадни тир. Ада гьар жуьре нехишрин, чешнейрин халичаяр храна. Са халича устаддиз Индиядин премьер Индира Гандидин шикил аваз храз кIан хьана. Идакай СтIал Мислимата Индира Гандидиз хабар гана. Кьулан СтIалдал яргъал тир Индиядай хтай кагъазда Индира Гандиди халичайрин устаддиз ихьтин фикир кьилиз атунай сагърай лагьана ва халичада тIебиатдин гуьзел чкайрин ва набататрин шикилар тун меслят къалурна. Индияда инсандин шикил халичада тун хъсан кар яз гьисабзавач. СтIал Мислимат бейкеф хьанач. «Уьмуьрда рикIел аламукьдай кар хьана», — хъуьрез-хъуьрез лугьудай ада. СтIал Мислимата, Индира Гандидиз бахшна, «Къизилдин къуш» халича храна, ам премьердал агакьарна.

Ктабда С. Мислиматакай­­ ком­позитор М. Абдулмута­либова­­дин, алим И. Гьуьсейнован, журналистар тир Т. Мегьамедо­ван, Ш. Шихмурадован, Гь. Иль­я­со­ван, М. Ибрагьимован­, Т. Иль­­­я­со­вадин фикирар, ма­къа­ла­яр, С. Саидгьасанова, Э. Сай­­­ду­мова шаирдиз бахш­на­вай шиирар ва А. Ашурагъаеван­ «СтIал диде» поэма гьатнава.

Хазран  Кьасумов