Дагъустанда гьуькуматдин цIийи шабагь пайда хьанва: РД-дин Халкьдин Собраниди, инсанар къутармишдайла, акьалтIай викIегьвилер къалурзавай аялриз ва жаванриз (чпин яшар 16 йисалай виниз тушир) гудай «За смелость и отвагу» медаль тешкилнава.
Ихьтин шабагь арадал гъунин теклиф республикадин Халкьдин Собранидин Председатель Заур Аскендерова гана. Адан гафаралди, цIийи шабагьди акьалтзавай несилрин викIегьвилер кутугай дережада къейд ийиз куьмекда ва ахьтин жаванрилай чешне къачудайбурун кьадар артух хьуниз таъсирда.
«Амайбуруз чешне къалурзавайбурун агалкьунар къейд авун герек я. Ихьтин шабагьри ва мярекатри акьалтзавай несилар руьгьдин жигьетдай викIегьбур ва халис ватанпересар яз тербияламишиз куьмекда», — лагьана З. Аскендерова.
Чи мухбир
