«Лезги газетди» 2019-йисан конкурсрин нетижаяр кьунва

2019-йисан конкурсрин нетижаяр

“Лезги газетдин” сад лагьай редактор, фольклорист,  литератор, чIехи алим, общественный  деятель Гьажибег Гьажибегован тIва­рунихъ галай  премия  — 10 000 манат — милли журналистика, литература, илим вилик тухунин кардик лайихлу пай кутунай гузва.

Лезги публицистикадин бине кутур  алимдин тIварцIихъ галай  и премиядиз “Лезги газетдин” жавабдар секретарь, бажарагълу журналист  Шихмурад  Шихмурадов  ла­йихлу хьанва. Адан гьикаяйрикайни шиир­рикай ибарат тир сифте ктабдани, газетдин чинал кьве нумрада (№13, 14 — 2019-й.) чап авур “Акьул — камалдин бине” макъаладани милли чIал, меденият ва адетар хуьнин месэлайри асул чка кьунва. И месэлаяр адан вири яратмишунра гьисс ийиз жеда, абур кар алайбур, рикIик гьамиша секинсузвал кутазвайбур я лагьай­тIа, зун ягъалмиш жедач.

Лезгийрин машгьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, чи халкь паталди вичин метлеб садрани квахь тийидай  ва вичиз тешпигь авачир урус чIаланни  лезги чIалан таржумадинни баянрин (переводно-толковый) зурба словарь (35 агъзур гаф  ава)  багъи­шай  Мегьамед Гьажиеван  тIвару­нихъ галай  премия  — 5000 манат — лезги чIал хуьник, чируник, ахтармишуник, девлетлу авуник пай ку­ту­рбуруз гузва.

И премия “Лезги газетдин”  кьилин редактордин заместитель, муаллим ва датIана хайи чIа­лан месэлайрал машгъул кас тир ­Куругъли  Ферзалиеваз гун къарардиз къачуна. Ада хайи чIал хуьн ва чирун патал ийиз­вай ахтармишунрихъ, кьиле тухузвай кIва­лахдин нетижайрихъ галаз “Лезги газет” кIел­завайбур фадлай таниш я.

2019-йис Россияда Театррин йис яз малумарнай.  Милли  искусство   раиж авунин,  и хиле арадал атанвай месэлаяр ачухарунихъ галаз алакъалу яз «Лезги газетди», адет хьанвайвал, пуд чкадикай ибарат конкурс малумарнай.

Къейдна кIанда, и месэладай редакциядиз макъалаяр кхьейбур гзаф хьана — милли ирс хуьнихъ рикI кузвай, аквазвай татугайвилерин патавай кьил элкъуьрна тефизвай, къарши яз, абурукай ачухдаказ лугьузвай, халкьдин фикир желбзавай  куьн вири сагърай.

1-премиядиз — 3000 манат — “Сегьнедин гьамбал” макъаладай  «ЛГ»-дин  литературадин  отделдин редактор ва шаир  Мердали  Жалилов  лайихлу хьанва.

2-премия — 2000 манат — Азербайжан Республикадин КцIар рай­ондай тир Гьасан  Хасиева къазанмишнава. И месэладиз талукь яз  ада газет кIелзавайбурун вилик пуд макъала гъанва. Авторди ва­цIун­ а пата (Азер­байжанда) авай лезгийрин вилик меденият, чIал хуьнин жигьетдай акъвазнавай хци месэлайрикай, абурун дуланажагъдикай  хабар гун, гьелбетда, анжах тереф хвена кIанзавай кIвалах я.

3-премиядиз  — 1000 манатдиз – “Сегьнедин билбил” (Дурия Рагьимовадин 90 йис тамам хьуниз талукь) макъаладай Хив райондин ЦIийи Фригърин юкьван школадин  муаллим Эдуард  Ашурагъаев  лайихлу хьанва.

“Хъсан шикил” ва “ИкIни жеда кьван!” конкурсар “ЛГ”-дин редакцияда кардик кваз гзаф йисар я. ИкI,  “Хъсан шикилдай” премия (1000 манат) и сеферда Ахцегь райондин “ЦIийи дуьнья” газетдин мухбир Юсиф  Саркароваз гудайвал хьанва. Ада янавай Миграгъ ва Ялцугъ хуьрерин шикилар, дугъриданни, газет кIелзавайбурун фикир желбдайбур я.

“ИкIни жеда кьван!”  конкурсда (1000 манат) Мегьарамдхуьруьн райондин Гилийрин хуьруьн школадин муаллим  Фазила  Абасовадин “Гурарин къимет” макъала гъалиб хьанва. Ада газетдиз рекье тур и ва са жерге маса, дерин манадин таъсирлу макъа­лайри газет кIелзавайбурун фикир фадлай желбзава.

Алатай йисуз чна жегьил несилар хайи чIалал ва литературадал ашукьарунин ва абурун арада бажарагълубур тайинарунин мураддалди цIийи мад са шумуд конкурс малумарнай.

ИкI, кардик кутур “Гьевес кутадай премия” — 1000 манат ва диплом — “Лезги газетдиз” яшайишдин месэлайрай са шумуд макъа­ла ре­кье тур Белиж поселокдай тир муаллим  Гьасан  Гьуьсейнова къазанмишнава.

Жегьил несилар хайи чIалал ва литературадал желбунин ва абурун арада бажарагълубур тайинарунин мураддалди чна цIийи мад пуд конкурс малумарнай.

Сад лагьайда  — “Виридалайни хъсан гьикая” (3000 манат ва диплом) — Мегьарамдхуьруьн 1-нумрадин (лезги арифдар Мегьа­мед Гьажиеван тIварунихъ галай) юкьван школадин 9-классдин ученик ва М.Гьажиеван неве Айдин  Гьажиев гъалиб хьанва.  Ада чав агакьарай “Бубайрин тIварар”  макъа­ла, куьруьди ятIани, важиблу месэла къарагъарзавайди, гьар са касдиз таъсирдайди  я лагьайтIа жеда.

Кьвед лагьайдан —  “Виридалайни хъсан очерк” (2000 манат ва диплом)  — гъалибчи  ДГУ-дин студентка, Сулейман-Стальский райондин Испикрин хуьряй тир Жемиля Ризаева я (адан макъалаяр “Лезги газетдин” 28,32 ва 44-нумрайрай кIелиз жеда).

Пуд лагьай конкурсдин — “Виридалайни хъсан шиир” (1000 манат ва диплом) — гъалибчияр редколлегиядин рейсад тир къарардалди кьве рушакай хьанва. Кьурагь райондин КIирийрин хуьруьн мектебда кIелзавай Имарат  Багьадуровади Советрин Союздин Игит, вичин хуьруьнви Эсед Салигьовакай (“ЛГ”-дин 6-нумра) ва Сулейман-Стальский райондин Вини СтIал­рин хуьруьн мектебдин 9-классдин ученица Карина   Пирмегьамедовади вичин хуьруьнви, лезги халкьдин зурба шаир СтIал Сулейманакай шиирар (17-нумра)  — кьведни еке бажарагъдивди, рикIин дериндай къвезвай гьиссералди кхьенва. Мектебра кIелзавай  жаванри  бубайрин ерийриз, абурун баркаллу тIварариз, хайи чилин игитриз рикIин сидкьидай гьуьрмет авуни, абурун тIварар шииррин цIа­рара аваз хуьз алахъуни, са шакни алач, чи рикIе­рик шадвилин гьиссер кутазва, халкьдин гележегдиз умудлу яз килигдай мумкинвал гузва. Баркалла квез!

Инал къейд ийин, алатай йисуз чна мад са конкурсдикай малумаранай: “Баян галай карикатура”. И жуьредин шейэр  чав агакь тавун себеб яз, алукьзавай йисуз чна ам къуватдай вегьезва.

Конкурсра гъалиб хьанвай чи юлдашриз редакциядин коллективди  агалкьунар рикIин сидкьидай тебрикзава ва инлай кьулухъни абурулай  метлеблу, маналу макъалаяр мадни ва мадни гуьзлемишзава! Премиярни дипломар, редакциядиз атана, вахчуз жеда.

«Лезги газет»


Всего просмотров: 65
Подпишитесь на наши каналы:

Читайте также:


Новости партнеров