Кьилин редактордин гаф
Гьар йисан эвел кьиляй алатай йисан нетижаяр кьун, агалкьунрикайни гъалибвилерикай, гьялиз кIанз, амма бязи себебар аваз, гьялиз тахьай месэлайрикай, цIийи йисуз вилик акъвазнавай везифайрикай, кьилиз акъуддай крарикай рахун хъсан адетдиз элкъвенва. И макъалада чунни шаз «Лезги газетдин» редакцияди кьиле тухвай кIвалахрикай, мярекатрикай куьрелди рахада.
Вилик йисара хьиз, шазни, цIини «Лезги газет», тираждин кьадардал гьалтайла, Дагъустандин гьукуматдин газетрин (гьам милли, гьамни урус чIаларал акъатзавайбурун) арада 1-чкадал ала. Им чи хайи чIалал акъатзавай газет кхьенвай гьар са ватанэгьлидин гъалибвал хьиз кьабулиз жеда. Гаф кватай чкадал къейд ийин хьи, эхиримжи са шумуд йисуз редакцияди «Лезги газет» — гьар са кIвализ» серенжем кьиле тухузва. Адан сергьятра аваз, мумкинвилер авай лезги стхайри, вахари чпин хайи хуьрериз, мектебриз, тIимил таъмин тир хизанриз газетар кхьизва. Абурукай бязибурун тIварар кьан. ФЛНКА-дин президент Васиф Гьасанова Докъузпара райондин Вини Къурушрин хуьруьн вири жемятдиз (86 хизандиз) почтадин алакъадин отделенидай газетар кхьиз са шумуд йис я. РФ-дин журналистрин союздин Дагъустанда авай отделенидин ревизиядин комиссиядин председатель Мурад Мегьамедкеримова СтIал Сулейманан райондин Агъа СтIалрин ва Агъа СтIал-Къазмайрин мектебра кIелзавай аялриз гьар йисуз 100 газет кхьизва. ЦIи ФЛНКА-дин Советдин председатель Ариф Керимова, жемиятдинни сиясатдин машгьур векил Мамед Абасова, РД-дин Халкьдин Собранидин депутат Имам Яралиева газет кхьин патал редакциядиз гьар сада 100 агъзур манат, бине АрхитIай тир карчи Альберт Эмиргъаева 50 агъзур манат пул чара авуна.
Газет кхьинин карда куьмекар гузвайбур мадни ава: ДГТУ-дин ректор Назим Баламирзоев, и вуздин муаллим Агъамет Салагьов, карчи Шагьпаз Асаханов, ФЛНКА-дин векил Садикь Гьасанов ва масабур. Къуй абурун крарик мадни гзаф берекатар акатрай!
Шаз редакцияди кьиле тухвай мярекатрикай рахайтIа, сифте нубатда гьар йисуз Каспийск, Махачкъала шегьеррин ва Кьиблепатан Дагъустандин мектебра кIелзавай аялрин арада лезги чIалай тешкилзавай олимпиадаяр къейд ийиз кIанзава. Кьвед лагьайди редакцияди «Леки» фондунихъ ва ФЛНКА-дихъ галаз санал тешкилзава. Гьакъикъатдани, и мярекатрихъ хайи чIал хуьнин ва вилик тухунин жигьетдай акьалтIай метлеб ава. Мадни, «Лезги газетдин» редакцияди ФЛНКА-дихъ ва Алкьвадар Гьасанан тIварцIихъ галай медениятдинни марифатдин центрадихъ галаз санал вузра кIелзавай лезги студентрин арада публицистикадин, газет кIелзавайбурун арада Ислам диндиз талукь, «Леки» фондунихъ галаз санал Докъузпара районда лезги чIалалди шиирар кIелунай конкурсар, лезгийрин жемиятдин са шумуд тешкилатдихъ галаз санал Лезги диктант тухвана.
2024-йисуз вири Дагъустанди XX асирдин Гомер СтIал Сулейманан 155 йисан юбилей къейдна. Чи редакцияни и лишанлу вакъиадивай къерех хьанач. Бине Ахцегь райондай тир машгьур карчи Нариман Гъазалиеван куьмекдалди СтIал Сулейманан «Гьарда вичикай хан ийида» шиир кIелунай уьлкведин дережада аваз онлайн-конкурс тешкилна. Ана неинки са чи республикадай, гьакIни Россиядин жуьреба-жуьре шегьеррай саки 300-дав агакьна аялри иштиракна. Сифте чкаяр кьур вад аялдиз 30, 25, 20, 15, 10 агъзур манатдин кьадарда аваз пулдин пишкешар гана.
Алатай йисуз фадлай чи редакцияда кIвалахзавай, алай вахтунда жавабдар секретарь тир Шихмурад Шихмурадова, экономикадин отделдин редактор Жасмина Саидовади, хейлин йисара редакцияда зегьмет чIугур, алай вахтунда, лайихлу пенсиядиз экъечIна, ял язавай Надият Велиевади чпин юбилеяр къейдна. Къуй чпихъ чандин сагъвал, яргъи уьмуьр, хизанра бахт, берекат хьурай!
Шаз редакциядин медениятдинни эдебиятдин отделдин редакторни дегиш хьана. Кар алай отделрикай сад яз гьисабзавай и отделдин кьиле, лезгийрин машгьур шаир Мердали Жалилов пенсиядиз экъечIайдалай кьулухъ, Дагъустандин халкьдин шаир Хуьруьг Тагьиран хва Максим Алимов акъвазна. Амма, Дагъустандин писателрин союздин лезги секциядин регьбердин везифаярни адан хиве гьатайвиляй, ам редакциядай экъечIуниз мажбур хьана. Адан чкадал вичи виликдайни редакцияда зегьмет чIугур пешекар журналист, хъсан гьикаятчи, таржумачи, бине Испикрин хуьряй тир Гьажи Ильясов атана.
«Лезги газетдин» редакциядин векилри алатай йисуз лезги халкьдин уьмуьрда кьиле фейи гзаф кьадар лишанлу вакъиайриз талукьарнавай мярекатра иштиракна, абурукай хъсан макъалаяр, репортажар, очеркар гьазурна, газетдин чинрилай кIелзавайбурал агакьарна. Идалай гъейри, редакциядин мухбирри газет кIелзавайбурулай къвезвай чарара къарагъарзавай месэлайриз, суалриз талукь макъалаярни тIимил кхьенач.
«Лезги газетдин» редакция вилик финин рекье ава. ЦIи, винидихъ тIварар кьур мярекатрал алава яз, чахъ Дербент шегьердин мектебра кIелзавай аялрин арадани лезги чIалай олимпиада тешкилдай, аялар патал лезги чIаланни урус чIалан визуальный гафарган чапдай акъуддай, куьмек гудай меценат пайда хьайитIа, махсус сканер маса къачуна, редакциядин архивда авай вилик йисарин газетар электронный вариантдиз элкъуьрдай ва хейлин маса ниятар, фикирар ава. ИншаАллагь, абур чна кьилизни акъудда!
Мегьамед Ибрагьимов
