СтIал Сулейманан райондин администрациядин пресс-къуллугъди хабар гузвайвал, районда дяведин махсус серенжемда игитвилелди телеф хьайи кьегьалар Сиражудин Агъаларов, Леонард Гьасанов ва Эльмар Тагъиев эбеди авуниз талукьарнавай мярекатар кьиле тухвана. Абур, женгинин муракаб тапшуругъар тамамардайла, 2025-йисуз телеф хьана.
Пашманвилин мярекатар ЦIийи Макьарал ва Чуьхверхуьре кьиле фена. Анра райондин администрациядин, хуьрерин муниципалитетрин къуллугъчийри, мукьвабуру, школайрин коллективри ва хуьруьнвийри иштиракна. Райондин администрациядин кьил Саид Темирханова Ватандин итижар намуслувилелди хвейи, женгера кьегьалвилер къалурай рухваяр тербияламишай диде-бубайриз ва школайрин педагогриз сагърай лагьана.
«Ахьтин кьегьал рухваяр чи арада амукь тавун чун вири патал мусибат я. Чна абур чи рикIера эбеди яз хуьда, абурун къагьриманвиликай акьалтзавай несилдиз суьгьбетда. Чи аялриз, жаванриз чпин игитар чир хьун лазим я», – лагьана С. Темирханова.
Муниципалитетдин кьили къейд авурвал, СтIал Сулейманан райондай алай вахтунда дяведин махсус серенжемда ирид вишелай виниз аскерри, офицерри иштиракзава. Абурун арада Ватандин итижар хуьз гуьгьуьллувилелди фейибур гзаф ава.
Кьве хуьрени игитриз талукь мемориальный кьулар райондин кьил С. Темирханова ва игитрин багърийри ачухна. Иштиракчийри анрал цуькверин кIунчIар эцигна.
Абад Азадов
