Ремиев Абдулбаридин гада Мугьаммад 2018-йисуз Мегьарамдхуьруьн райондин Советский хуьре дидедиз хьана. Ада цIи 2-класс агалкьунралди куьтягьна.

– Мугьаммада, хъсандиз кIелзавай хьиз, класс­дин ва школадин общест­венный уьмуьрдани актив­нидаказ иштиракзава, – лу­гьузва синифдин регьбер Шуьшеханум Ферзалиевнади.

Мугьаммадахъ гьакIни Ислам дин чирунин рекьяй виле акьадай хьтин агалкьунар ава. Чеб диндар инсанар тир буба Абдулбариди, диде Эльфиради гададив, адан 3-4 йис хьайила, Къуръандин аятриз яб гуз туна, 5-6 йис хьайила, адаз араб гьарфар, Къуръан кIелиз чирна. Алай вахтунда Мугьаммада Къуръандин 30-жуз ва 29-жуздин «Жинерар» сурадал кьван хуралай чирнава.

15-мартдиз Дербент шегьерда рес­публикадин кьиблепатан районрин мектебра кIелзавай аялрин арада Къуръан кIелунай кьиле фейи конкурсда Мугьаммада 2-чка кьуна. Конкурсдин жюридик квай Исламдин илимрин доктор Гьашим Мегьамедова ва масабуру Мугьаммада «аль — Фа́тигь́агь» ва «Гьамма» жуздай «аш-Шамс» сураяр хуралай кIелай тегьердиз виниз тир къимет гана. Нетижада ам грамотадизни 20 агъзур манатдин кьадарда авай пулдин пишкешдиз лайихлу хьана.

Мугьаммада неинки вичин диде-бу­бадивай чирвал къачузва, ада гьакIни тIатIилрин вахтунда хуьруьн мискIиндин имамдивай Къуръан кIелунин къайдаяр чирзава, «тажвид»1, «махрадж»2 мягькемарунин карда зегьмет къачузва. Планшетдин куьмекдалди Къуръандин лап хъсан кIелчийриз яб гана, вичин кIелун гуьрчегариз алахънава. Къуй Мугьаммадахъ мадни еке агалкьунар хьурай. Амин!

____________________

1 Къуръан дуьз къайдада ва хъсан сесиналди араб чIалалди кIелуниз (гьарфар тамамви­лелди, дуьз жуьреда лугьуз, кимивилер ва артуханвилер кутун тавуна) тажвид лугьуда.

2 «Махрадж» — гьарфар сивяй акъуддай чкаяр ва ерияр.

Сулейман  Пашаев