Дагъустан Республикадин Гьукуматдин Председатель Мегьамед Рамазанован регьбервилик кваз 15-июндиз Мегьарамдхуьруьн райондин Билбил-Къазмаяр хуьре, эцигиз гъиле кьуна, куьтягьиз тахьанвай школадин дараматдин гьакъиндай герек теклифар гунин месэладиз талукьарнавай совещание кьиле фена. Мярекатда республикадин талукь министерствойрин ва ведомствойрин регьберри, Мегьарамдхуьруьн райондин администрациядин кьили ва гьакIни дарамат эцигзавай «Каспийскстрой» ООО-дин регьберди иштиракна.
РикIел хкин хьи, 2011-йисуз инвестор «Каспийскстрой» ООО-дин устIарри Билбил-Къазмаяр хуьре школадин дараматдин эцигунар гъиле кьунай. 440 аял патал инвестордин такьатралди эцигзавай дарамат эхирдалди куьтягьиз хьанач. Идахъ бязи себебар авай.
Пуд мертебадин дарамат эцигна, адал къаварни гьалдна. Амма къенепатан кIвалахар ийидай, коммуникациядин линияр тухудай, спортзал, столовая, герек маса кIвалер эцигдай мумкинвал амукьнач. Хуьруьн аялар патал лап важиблу дарамат ишлемишиз вахкана кIанзавайдакай ихтилатар ийиз 10 йис я. Патав мектебдин куьгьне дараматар гва, абур ишлемишиз 65 ва 40 йисар я. Ана алай вахтунда 260 аялди кIелзава.
Совещанидал ихьтин месэлаяр къарагъарна: эцигна куьтягь тавунвай объект маса къачун; адан гележегдин кьисмет тайинарун; эцигунрин кIвалахар куьтягьуниз ва дарамат ишлемишиз вахкуниз талукь такьатар тайинарун.
И месэлайрай рахунар РД-дин талукь министерствойрин регьберри авуна. РД-дин эцигунрин, архитектурадин ва ЖКХ-дин министерстводин делилралди, алай йисан мартдин вацра райондин администрацияди дараматдиз талукь аслу тушир экспертиза кьиле тухвана. Ада тайинарайвал, эцигунринни монтаждин кIвалахар ерилудаказ тамамарнава, абуру эцигунрин вири жуьредин нормайриз ва къайдайриз жаваб гузва. Дараматдикай агьалийриз хата хкатдайвал авач.
Мегьамед Рамазанова, хуьре авай школадин дарамат куьгьнеди хьунихъ галаз алакъалу яз, эцигиз гъиле кьунвай объектдин яшайишдин рекьяй чIехи метлебдикай лагьана. И месэла гьялун патал кьетIи серенжемар кьабулун герек я.
Совещанидал РД-дин Гьукуматдин Председателди са жерге тапшуругъар гана: гьукумдин талукь органри ГРБС ва дарамат эцигна куьтягьдай заказчик тайинарун, объект маса къачуниз талукь къиметдин гьакъиндай теклифар гун, проектдинни сметадин документра дегишвилер хтун, республикадин бюджет тайинардайла, адак герек кьадар такьатар кухтун.
И тапшуругъар вири уьмуьрдиз кечирмишайла, тум галай эцигунар куьтягьдай ва Мегьарамдхуьруьн райондин Билбил-Къазмайрин школьникриз къулайдаказ кIелдай шартIар арадал гъида.
Алава хъийин хьи, школадин дарамат эцигуник кьил кутурди Каспийск шегьердин СМУ-5 карханадин генеральный директор, меценат Фридун Шагьпазов тир. Ада вичин патай Приморск поселокдани школадин дарамат эцигна, ам пулсуз государстводив вахкана. Амма Билбил-Къазмайрал эцигзавай школа эхирдалди кьилиз акъуддай мумкинвал ганач.
Инсанриз хъсанвал ийизвай Фридун Шагьпазоваз сагърай, баркалла лугьудай чкадал адан гуьгъуьна, жуьреба-жуьре ахтармишунар ийиз, гьукумдин органрин къуллугъчияр гьатна. И вахтунда меценат вичин такьатрикайни магьрум хьана ва дарамат куьтягьдай мумкинвални амукьнач. 2016-йисуз и важиблу месэладал уьлкведин Президент Владимир Путинани фикир желбнай ва Дагъустандин Гьукуматдал инвестордин ихтиярар хуьн ва адаз школадин дарамат эхирдалди куьтягьиз куьмек гун тапшурмишнай. И тапшуругъ къенин йикъалди кьилиз акъуднавач. Гила Фридун Шагьпазова вичи эцигнавай дарамат государстводи вахчунин теклиф ганва. Адахъ вичихъ такьатар амач. Белки, гила кьванни Билбил-Къазмайрин аялар патал эцигзавай школадин дарамат куьтягьин.
Гьа и юкъуз Мегьамед Рамазанова тIебиатдин бедбахтвилик акатай мулкара образованидин фад эцигиз жедай дараматар хкажуниз талукь совещанини кьиле тухвана. Премьер-министрди рикIел хкайвал, Россиядин Федерациядин Гьукуматди образованидин 36 дарамат чкадиз хкун патал 2,057 миллиард манат чара авунва.
«И месэла датIана республикадин регьбер Федор Щукинан гуьзчивилик ква. Гьукумдин и меэладихъ галаз алакъалу вири органри образованидин объектар вахтунда ишлемишиз вахкун патал къуватар сад авуна кIанда», – лагьана М. Рамазанова.
Хийир Эмиров
