(Эвел — «Лезги газетдин» 2025-йисан 35, 37-40-нумрайра, 2026-йисан 18-нумрада)
9—кьил: Имандин лишан я — «анса́рар» кIан хьун
- 17. Асгьабди (Абу Гьурайради) (Аллагь рази хьурай вичелай) хабар гузва, Пайгъамбарди (Аллагьдин патай салават ва салам хьуй вичиз) лагьана (мана): «Имандин лишан я «анса́рар», яни Мединадин асгьабар кIан хьун. Мунафикьвилин лишан я «анса́рар» такIан хьун». (Бухарий: 17)
- Уба́дагь ибн ас-Са́мит асгьабди (Аллагь рази хьурай вичелай) хабар гузва: Аллагьдин расулди (Аллагьдин патай салават ва салам хьуй вичиз), адан патав са десте вичин асгьабар гвайла, лагьана (мана): «Кьин це куьне заз и крарал: куьне Аллагьдиз са шейни шерик яз гъидач, чуьнуьхдач, (угъривал) ийидач, «зинавал»1ийидач, куьне куь аялар ягъиз рекьидач, буьгьтенар вегьедач, куь гъилералди ва кIвачералди къундармишиз (яни и крар ийидайла, инсандин бедендин паярикай менфят къачуникай ихтилат физва. Инал гъилер ва кIвачер къалурнава, вучиз лагьайтIа, чIехи пай крар абуралди ийизва). ИтIаатсузвал (асивал) ийидач дуьз крарин гьакъиндай. Ни квекай кьин тамамдиз кьилиз акъудайтIа, адан суваб (эвез) Аллагьдал ала, ни а къадагъайрикай са кар авуртIа (ва гьавиляй) адаз и дуьньяда жаза хгайтIа, ам адаз «каффа́ра» (гунагь алудун патал гузвай гьакъи) я, ни а крарикай са шей авуртIа, ахпа ам Аллагьди чуьнуьхайтIа (кIевайтIа), адан кар Аллагьдал жеда. Эгер Адаз кIан хьайитIа, Ада адалай гъил къачуда ва эгер Адаз кIан хьайитIа, Ада адаз жаза гуда». Дугъриданни, чна адаз а крарин патахъай кьин гана. (Бухарий: 18)
10-кьил: Ислам диндикай я:
фитнейрикай (шулугърикай) катун
- Абу Саи́д аль-Худрий асгьабди (Аллагь рази хьурай вичелай) хабар гузва, Аллагьдин расулди (Аллагьдин патай салават ва салам хьуй вичиз) лагьана (мана): «Мукьвал хьанва а вахт (виче) мусурмандин виридалайни хъсан мал лапагар яз гьисабдай, абурун гуьгъуьнаваз ам дагъларин кукIвара ва (марфадин) стIал квай чкайра фидай — адалди вичин Дин гваз фитнейрикай (шулугърикай) катиз!» (Бухарий: 19).
12—кьил: Иман-эгьлийрин артухвал (масадалай винизвал) амалрин
гьакъиндай
- 22. Абу Саи́д аль-Худрий асгьабди (Аллагь рази хьурай вичелай) хабар гузва, Аллагьдин расулди (Аллагьдин патай салават ва салам хьуй вичиз) лагьана (мана): «Зун ксанвай чIавуз заз (ахварай) акуна: инсанар заз къалуриз, абурал абаяр (халатар) алаз, абурукай садбур хурудив агакьзавай ва муькуьбур маса жуьре (адалай куьруь ва я яргъи) тир ва къалурна заз Умар ибн аль-ХатIтIа́б ва адал чилелай галчIурзавай аба алай». Абуру лагьана: «Вуч тедбир (баян) гана вуна а ахвариз, я Аллагьдин расул (Аллагьдин патай салават ва салам хьуй вичиз)?» Ада лагьана: «Дин!» (Бухарий: 23)
13—кьил: Гьаялувал имандикай я
- 23. Ибн Умар асгьабди (Аллагь рази хьурай вичелай) хабар гузва, Аллагьдин расул (Аллагьдин патай салават ва салам хьуй вичиз) «анса́ррикай» (Мединадин асгьабрикай) са итимдин патавай фена, атIада вичин стхадиз гьаялувилин (ягь-намусдин) гьакъиндай насигьат (вяз) ийизвайла. И арада Аллагьдин расулди (Аллагьдин патай салават ва салам хьуй вичиз) лагьана (мана): «Тур (вуна) ам, гьакъикъатда гьаялувал (ягь-намус) имандикай (са пай) я». (Бухарий: 24)
(КьатI ама)
__________________
1 «Зина» – прелюбодеяние.
Таржумачи – диндин алим Ямин Мегьамедов
