Гь. Ж. Мурадалиев

31-мартдиз чав залан хабар агакьна: 66 йисан яшда аваз Мегьарамдхуьруьн райондин администрациядин кьилин сад лагьай заместитель Гьабибуллагь Желилович Мурадалиев рагьметдиз фена.

Гь.Ж.Мурадалиев 1954-йисуз дидедиз хьана. 1975-йисуз ада Кубандин хуьруьн майишатдин институт акьал­тIар­на ва Мегьарамдхуьруьн райондин “Серго” совхозда агроном яз кIвалахиз гатIунна. 1977-1979-йисара Гь.Мурадалиева Мегьарамдхуьруьн райондин ВЛКСМ-дин гьахъ-гьисабдинни финансрин сектордин, гуьгъуьнлай, са йисан вахтунда, тешкиллувилин отделдин заведующийдин везифаяр тамамарна.

1980-йисуз ам Мегьарамдхуьруьн райондин ВЛКСМ-дин 1-секретарвиле тайинарна. И къуллугъ кьиле тухуз пуд йис арадай фейила, Гь.Мурадалиеваз Советрин Армиядин жергейриз къуллугъиз эвер гана. Ада Ватандин вилик вичин хивевай пак буржи сиясатдин рекьяй ротадин командирдин заместитель яз кьилиз акъудна.

Армиядилай гуьгъуьниз ада жуьреба-жуьре йисара Мегьарамдхуьруьн райондин “Сельхозхимия” объединенидин председатель, “Мирный” совхоздин директор, райондин администрация­дин сад лагьай заместитель яз кIвалахна.

1998-2001-йисара райондин администрациядин кьилин сад лагьай заместитель яз хуьруьн майишатдин управленидин начальникдин везифаярни тамамарна.

2001-йисалай вичин уьмуьрдин эхиримжи йикъалди Гь.Мурадалиева Мегьарамдхуьруьн райондин администрациядин кьилин сад лагьай заместитель яз зегьмет чIугуна.

КIвалахдин рекье къалурнавай агалкьунрай адаз РД-дин Госсоветдин Гьуьрметдин грамота, “РД-дин хуьруьн майи­шатдин лайихлу работник”, “РД-дин халкьдин образованидин отличник” тIва­рар гана.

Гьабибуллагь Желилович «Лезги газетдин» вафалу амадагрикайни сад тир. Ада гьар йисуз милли чIалал акъатзавай газетдин тираж артухаруник вичин пайни кутазвай. Ам къени инсан, хайи чилин, чIалан къадир авай чIехи ватанперес, кар алакьдай тешкилатчи, тежрибалу меслятчи, насигьатчи тир. Гьахьтинди яз ам чи рикIерани амукьда.

“Лезги  газетдин” редакциядин коллективди Гьабибуллагь Желилович Мурадалиев рагьметдиз финихъ галаз алакъалу яз адан хизанриз, багърийриз башсагълугъвал гузва.


Всего просмотров: 83
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире