Къведай гьафтеда Махачкъалада «Собери Университет» лишандик кваз чIехи хакатон кьиле фида. Хакатон – им кIвалахдин майдан, къайда, яни цIийи технологийрин хиле чпихъ хсуси фикирар, проектар, и жигьетдай алакьунар авай жегьилривай виликамаз арза авуна иштиракиз жедай махсус мярекат я. Хакатонда кьуд ва гзаф ксарикай ибарат тамам дестейри иштиракзава. Дестедик квачиз иштиракзавайбурун арадани гьа чкадал сад хьтин командаяр тешкилзава.

«Собери Университет» Санкт-Петербургда, Москвада, Ульяновскда, Томскда, Владивостокда ва Махачкъалада кьиле фида. Адан тешкилатчи мергьяматлувилин «Пери» фонд я.

Къе «Перидин» Дагъустан Республикада авай филиалдин директор Заур Омаров, анин акселерационный программайрин менеджер Раисат Дидуева журналистрихъ галаз гуьруьшмиш хьайила фондунин векилри къейдайвал, и хакатондин сергьятра аваз кIуьд IT-хиляй командайри проектар туькIуьрда ва абурун асул метлеб гележегдин университетдин образованидин процессда иштиракун я.

— ГьакIни чирвилер гунин ери хкажунин, биометрический анализдин инструментар еримишунин, образованидин процессда виртуальный тьюторрин месэлайрай иштиракчийрин хъсан теклифрал амал ийида, — лагьана Раисат Дидуевади.

Хакатондин жюридик вузрин, «Пери» фондунин, инвесторрин векилар жеда. Абуру лап хъсан пуд проект хкяда. Проектар уьмуьрдиз куьчуьрмишуни патал хакатондин инвестицийрин кьадар 10 млн манатдилай гзаф я.

— Хакатондин гъалибчийриз чпин проектар кардик кутун патал инвестицияр гуда, гележегдани проектар туькIуьрунин ва я арадал гъанвайдал кIвалах хъувун патал икьрар кIутIунда. ГьакIни гъалибчи дестеяр «Университет НТИ 20.35-да» кIвалахдал таъминарда я туштIа, абурун проект маса къачуда, — къейдна Заур Омарова.

Мугьманри мергьяматлувилин «Пери» фондунин кIвалахдикай, тешкилзавай мярекатрин жуьрейрикай, метлебдикай ва ийизвай маса кIвалахрикай суьгьбетарна.

1-9-ноябрдиз кьиле фидай «Собери Университет» хакатонда иштиракиз кIанибуру вахкутнда арза авун герек я.

Эмираслан Шерифалиев

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя