2015-йисан 25-июндиз РД-дин Халкьдин Собраниди “Дагъустан Республикадин административно-территориальный къурулушда дегишвилер тунин гьакъиндай” къарар кьабулнай. Адан бинедаллаз Сулейман-Стальский райондин Герейханован хуьруьн поселенидик цIийи хуьр — ЦIийи Мамрач кухтунай.
Ингье чун ЦIийи Мамрачрин хуьруьз мугьман хьанва. Яшайишдин, тIебиатдин жигьетдай къулай гуьрчег чкадал бине кутунва цIийи хуьруь: ам “Кавказ” федеральный шегьредилай Сулейман-Стальский райондихъ элкъвезвай къекъуьндал, Советский хуьруьн къаншарда ава. Кьилихъ дагълар гала, кIанихъай, арада тамун гапIал аваз, Гуьлгери вацI авахьзава.
Чна цIийи хуьруьн херхем вегьенвай куьчедай винелди яваш-яваш камар къачузва. Гуьгьуьл шад жезва. АкI я хьи, хуьр цIийиди туш, гьикI лагьайтIа, куьчейрин кьве падни яшайишдин кIвалер я, эцигиз гъиле авай кIвалерин кьадарни тIимил туш. Куьчейрик инсан ква, гъвечIи мамрачвияр ката-калтугунал, къугъунар авунал машгъул тир.
ЦIийи Мамрачрал яшайишдин рекьяй тухузвай ва гележегда тухудай кIвалахар райондин кьил Нариман Абдулмуталибован кьетIен гуьзчивилик ква.
— Хуьр цIийиди, ана социальный, экономикадин, культурадин ва маса рекьерай кьилиз акъудна кIанзавай крарин кьадар гзаф я, — лугьузва Н.Абдулмуталибова. — И кIвалахрив эгечIнава. Чи такьатралди ийизвай хейлин кIвалахар гъиле кьунва, республикадин властдин органриз талукь месэлаяр чна абурун вилик эцигзава. Аквазва хьи, хуьр арадал къвезва.
Хуьруьз райондин талукь къуллугъри, организацийри куьмекар гузва. ЦIийи хуьруьз куьмекдин гъил яргъи ийизвай кьилдин ксар-спонсорарни майдандиз акъатзава. ИкI, алатай йисуз куьчейриз херхем вегьинин, анагар къайдадиз гъунин кIвалахар “Куьре-Агро” МТС ООО-дин махсус бригадади хъсан ери аваз кьилиз акъудна.
ЦIийи Мамрачрал кьилиз акъуднавай кIвалахрин кьадар тIимил я лугьуз жедач. ИкI, куьчеяр къайдадиз гъунилай гъейри, ана подстанция эцигнава, экверин линия тухванва, агьалияр хъвадай ва дигидай целди таъминарнава.
Алатай йисуз Герейханован 1-отделенидай ЦIийи Мамрачрал газдин линия гъана, ихьтин линияр хуьруьн кьилин куьчейрани тунва.
— ЦIийи хуьр газламишуниз саки 20 миллион манат пул акъатда, — къейдна Н.Абдулмуталибова. — Ихьтин пулар, мумкинвилер райондихъ авач. Гьавиляй хуьр газдалди таъминарунин кIвалахар галаз-галаз са шумуд йисуз кьилиз акъудда.
Гьелбетда, гьялиз тахьанвай месэлаярни ава. Абурукай сад хуьре школа тахьун я. И кар себеб яз алатай кIелунин йисуз мамрачвийрин саки 30 аялди Мегьарамдхуьруьн райондин Советский хуьруьн юкьван школада кIелзавай. Райондин руководстводи автобус чара авуна цIийи хуьруьн аялар Герейханован 1-нумрадин юкьван школадиз гъизва.
Хуьре аялрин бахчадин, медицинадин, культурадин, спортдин идараярни эцигун лазим я. Абур патал чилин участокар чара авунва. Яваш-яваш социальный метлеб авай дараматар эцигун гъиле кьада. И кар патал райондин ва хуьруьн поселенидин администрацийри, маса къуллугъри герек чарар-документар гьазурзава.
Алай вахтунда ЦIийи Мамрачрин хуьре 400 майишат ава. Саки 250 хизанди яшайишдин кIвалер эцигнава. Эцигиз гъиле авай кIвалерин кьадар 50-дав агакьзава. Къуй авадан хьурай ЦIийи Мамрач.
Хазран Кьасумов
