Алай вацран сифте кьилерай Каспийскда, Али Алиеван тIварунихъ галай Спортдин дворецда, дишегьлийри кьуршахар кьунай Россиядин чемпионат кьиле фидайла чна спортдин и жуьредай дуьньядин (2011-йис) ва Европадин чемпионка, Россиядин спортдин лайихлу мастер, чи ватандаш Замира Рагьмановади уьлкведин виридалайни кьилин акъажунра иштиракуник еке умудар кутунвай. И чемпионатдиз талукьарнавай пресс-конференциядал З.Рагьмановади (Мегьамедаминовади) вич спортсменка яз мад гьасиррал эхкъечIдач лагьана малумарнай, виридалайни зурба медалар вичин аялар — кьве хва — тирди къейднай… Дишегьли патал хизан, аялар 1-чкадал хьунни лазим я.
И мярекатдал чаз мадни чир хьайивал, чи ватандаш руша ва адан уьмуьрдин юлдаш Багавдин Мегьамедаминова кьил кутуналди Каспийскда рушари кьуршахар кьун патал зал ачухнава, Замира Рагьмановади вичин къуватар гила тренервиле ахтармишзава. Алай вахтунда адан гъилик чпин устадвал хкажзавайбурук пешекарри чпик еке умудар кутазвай спортсменкаяр Виктория Ваулина ва Мадина Чубановани ава.
Са шумуд югъ идалай вилик чаз Замира Рагьмановадал Дагъустандин кьуршахар кьунай спортдин федерациядин вице-президентвилин везифаяр ихтибарнавайдакай хабар хьана, гила ада Дагъустанда дишегьлийри кьуршахар кьунин жуьредал гуьзчивалда. Чаз адахъ и жавабдар къуллугъдал еке агалкьунар хьана кIанзава.
— ЧIехи спортда вичин устадвал къалурун Замиради давамарначтIани, спортдивай-вичин рикI алай кIвалахдивай — ам къерех хьанвач. Ада зал жагъурна, ам тадаракламишна, ингье саки са йис я ада 40-50 рушаз спортдин и жуьредин сирер чириз,-къейднава Дагъустандин кьуршахар кьунай спортдин федерациядин сайтда и федерациядин сад лагьай вице-президент Омар Муртузалиева. — Чун инанмиш я, Дагъустандин дишегьлийри кьуршахар кьунин жуьре вилик тухун адал ихтибариз жеда. Шак алач, З.Рагьмановадин регьбервилик кваз республикадин дишегьлийри кьуршахар кьунай хкянавай командади хъсан ва бегьерлу патахъ рехъ давамарда. Дагъустанда еке гьуьрмет къазанмишнавай пешекарар-тренерар гзаф ава. Вичин хиве тунвай тайин везифайрикай менфят къачуна, Замиради — камаллу руша ва регьберди — вири а ксар санал кIватIунин, абуру саналди, са команда яз, кIвалахунин, зурба акъажунра иштиракдай ва гъалибвилер къазанмишдай спортсменкаяр гьазурунин къайда жагъурда, — кхьенва ана.
