Чи ватандаш, машгьур спортсмен Жабар Аскерова нубатдин бягьс Белоруссиядай тир дуьньядин са шумуд сеферда чемпион Чингиз Аллазовахъ галаз алай йисан 5-августдиз Китайда кьиле тухун пландик кутунва. Бягьс кикбоксингдин К-1 жуьредин къайдайрай Wu Lin Feng (WLF) турнирдин сергьятра аваз кьиле фида.
Азербайжанда хана ва ана чIехи хьанвайди тир Ч.Аллазова кикбоксингдай пешекарвилин рингда икьван чIавалди 50 бягьс кьиле тухвана, абурукай 48 бягьсина ада гъалибвал къазанмишна, абурукайни 30 — нокаутдалди.
Малум тирвал, тайский боксдай пешекаррин арада WMC версиядалди Европадин чемпион Ж.Аскерова пешекарвилин рингда кикбоксингдай 90, ММА-дайни 8 бягьс кьиле тухвана, са шумуд квачиз, амайбур вири гъалибвал къазанмишуналди акьалтIарна.
Къейд авун лазим я хьи, нубатдин бягьсина Жабар Аскерова гъалибвал къазанмишайтIа, адаз Йи Лонгахъ (ам шаолиньский монах лакIаб алаз чизва) галаз бягьсина вичин къуватар ахтармишдай мумкинвал жеда.
