Квез и шикилдай аквазвай  Амина  Жаруллаева  Махачкъаладин 48-нумрадин юкьван школадин 9-классдиз акъатнава. Са тIимил вахт идалай вилик ам “2017-йисан виридалайни хъсан ученик” тIвар алаз Махачкъалада 13-нумрадин гимназияда кьиле тухвай шегьердин конкурсда “Среднее звено” номинациядай 3-чкадиз лайихлу хьана. Адаз Махачкъала шегьердин образованидин управленидин начальник Тагьир Мансурован къул алай Диплом, къиметлу пишкеш гана.

Конкурс акьалтIайдалай кьулухъ чаз Амина чпин ери-бине Сулейман-Стальский райондин Ци­цIи­гъай тир Жаруллагь ва Рафима Жаруллаеврин хтул тирди чир хьана. ГьикI хьи, меркезда Даггоспедуниверситетдин биологиядин ва тарсар гунин рекьяй методикадин кафедрадин доцент, педагогикадин илимрин кандидат, вузда яргъал йисара зегьмет чIуг­вазвай Жаруллагь Гьамидуллаевич ва Махачкъа­ладин 48-нумрадин юкьван школада сифтегьан классрин аялриз чирвилер гузвай Рафима Исмаиловна (Аминадини сифтегьан классра вичин бадедин гъилик кIелна) чпел гьалтай карда куьмек гудай, сейли, гзафбуру гьуьрметзавай ксар я.

Конкурсдилай гуьгъуьниз чун А.Жаруллаевадихъ галаз гуьруьшмиш хьана. Амина, чинал мили хъвер алай, фад какахьдай къилихдин руш,  акурвалди зи рикIи чIугу­на­. Малум хьайивал, шегьердин конкурс кьве паюникай ибарат тир. Сад лагьай пай чкайрал заочнидаказ ­кьиле фена. ИкI, конкурсдин истемишунриз килигна, меркездин шко­лайра, лицейра, гимназийра хъсан къиметар аваз кIелза­вай, предметрай олимпиадайра кIвен­кIвечи чкаяр кьазвай, дустарин арада гьуьрмет, спортдин рекьяйни агалкьунар авай аялар хкяна. Чкай­рал и турда гъа­либ хьайибуру гуьгъуьнин паюна меркездин вири школайра кIел­завай аялрин арада чпин алакьунарни устадвал къалурна кIанзавай.

Кьилди къачуртIа, кьвед лагьай­ паюна конкурсдин иштиракчийри “Вуж я вун, XXI асирдин ученик?” су­­алдиз чпин кхьинин кIвалахра, гуьгъуьнлайни школада чирзавай 5 предметдай тестриз жавабар гун ла­зим тир. Аминади вичихъ вири предметрай акьалтIай хъсан чирвилер авайди субутна,  ада гзаф итижлу презентацияни гьазурнавай, эхирдай устадвилелди кьуьлерни тамамаруналди, конкурсдин жюридин членар гьейранарна.

Малум хьайи­вал, кьуьлерал Аминадин лап гъве­чIи чIавалай рикI ала, ам абурал­ рикIивай машгъулни жезва. Ру­ша школадин художественный самодеятельностдин кружокдани иштиракзава.

Чна Амина Жаруллаевадиз къазанмишнавай гъалибвал тебрикзава, адахъ мадни еке  агалкьунар хьун алхишзава!

Рагнеда Рамалданова