Дагъларин уьлкведа тербияламишунин кардиз гьамиша артух фикир гуз хьана, гилани гьакI я. “Дана епинамаз, аял кьепIинамаз вердишарна кIанда” лугьудай бубайрин мисалдихъ еке метлеб авайди мад ва мад субут хъжезва. И шикилдай аквазвай рушар чпел дамах ийиз жедайбурун жергеда ава. Ильясова Диана, Пирмегьамедова Эмилия, Эмирбегова Регина, Инаятова Наргиз, Абасова Лейла Сулейман-Стальский райондин Вини СтIалрин юкьван школадин 9-класс акьлтIарнавай рушар я. Абуру вирида, гьа сифте классрилай эгечIна, хъсан къиметар аваз кIелзава ва школадин общественный уьмуьрдани активвилелди иштиракзава, ина кьиле тухузвай вири мярекатра — конкурсра, олимпиадайра, ачух тарсара абуру чпин устадвал къалурзава. КIеве авай, кьулухъ галамукьзавай аялриз куьмек гунни рушари рикIелай ракъурзавач.
Гаф кватай чкадал рушари зурба пай ва кьил кутуналди тухвай мярекатрикай лугьуз кIанзава. ИкI, и мектебда “Шарвили” эпосдай гьазурай сегьнедиз райондин образованидин управленидин къуллугъчийри хъсан къимет гана. XX асирдин Гомер СтIал Сулейманан шиирар устадвилелди кIелунай кьиле тухвай конкурсда Диана Ильясовади ва Эмилия Пирмегьамедовади приздин чкаяр кьуна. Абуруз шаирар, РД-дин культурадин лайихлу работникар тир Сажидин Саидгьасанова ва Абидин Камилова чпин гъиликай хкатнавай ктабар, грамотаяр гана. Вини СтIалрин юкьван школадин директор Башир Алиев ва амай вири муаллимар и рушарилай гзаф рази я.
Хуш къилихар, чешнелу тербия авай вири 5 рушазни дустарин арада еке гьуьрмет ава. Абуру чпин агалкьунралди чун гележегда мадни шадаруник умуд кутунва.
Замир Мегьамедов, Вини СтIалар
