За суьгьбетзавай Пашаев Сулейман 1950-йисуз Ахцегь райондин Ялцугърин хуьре дидедиз хьана. 1952-1953-йисара Ялцугърин хуьр дагъдай арандиз куьч хьана. Жемятди Мамрачринни ХенжелкIеледин арада авай тIулал чпиз хуьр кутуна…
1956-йисуз С.Пашаев школадиз гьахьна, 1967-йисуз Советский хуьруьн юкьван школа акьалтIарай ам Киркарин юкьван школада старший пионервожатыйвиле кIвалахиз ракъурна.
1968-йисуз Дагъустандин госуниверситетдин филологиядин факультетдин урус ва Дагъустандин чIаларин отделенидиз гьахьна ва анаг вадралди акьалтIарна.
С.Пашаева Советрин Армиядин жергейра, офицердин чинда аваз, къуллугъна. Армиядай хтай 1975-йисалай ам Советский хуьруьн юкьван школада дидед чIалан муаллимвиле тайинарна ва ада къенин йикъалди, гьам коллективдин арада, гьам аялрин, абурун диде-бубайрин патайни гьуьрмет аваз, кIвалахун давамарзава.
Акьалтзавай несилдиз гьакъисагъвилелди дерин чирвилер ва тербия гунай Пашаев Сулейман са шумуд грамотадиз, 2006-йисуз лагьайтIа, Президентдин Грантдиз лайихлу хьана.
С.Пашаеван неинки муаллимвилин дережадикай, гьакI адан яратмишунрин агалкьунрикайни лугьуз кIанзава.
Сулейман муаллим райондин “Самурдин сес” газетдихъ ва республикадин “Лезги газетдихъ” галаз сих алакъада ава. Анриз ракъурзавай макъалайра ам диндикай, лезги чIалан, важиблу маса месэлайрикай кардин гъавурда аваз рахазва. Газетриз акъатай адан “Чна вагьабизм негьзава”, хуьруьнви подполковник рагьметлу Асваров Жаферакай, “Дагъдин мукай лув гайи лекь”, “Ирид стхадин къени хуьр”, “Тарихди шагьидвалзава” очеркар ва вичин муаллимвилин тежрибадикай кхьей хейлин макъалаяр кIелзавайбуру хушдаказ кьабулна.
1998-йисуз Махачкъала шегьерда С.Пашаеван “Ялцугърин хуьр” ктаб чапдай акъатна. И мукьвара чав Сулейман-Стальский райондин лезги зарийрин “Куьредин ярар” отделенидин центрада чапнавай адан “Пак фикирар” кьил ганвай цIийи ктаб агакьна. Ам вад паюникай ибарат я: I. Диде, Ватан, Уьмуьр. II. Багъш — шиирар. III. Кьве цIарар. IV. Кьудар. V. “Яшамиш жен, я эллер, чун” поэма. Ктабда гьатнавай шиирар манадиз дерин, кIелиз хуш жедайбур я. Ви къелем мадни хци хьурай, Сулейман!
Ферид Вагьабов
