И йикъара Дагъустан Республикадин Тахо-Годидин тIварунихъ галай Милли музейда Дагъларин уьлкведин районра кардик квай Россиядин халкьарин адетдин культурадин центрайрин кIвалах хъсанаруниз талукь семинар-совещание кьиле фена.
РД-дин культурадин министерстводи, республикадин халкьдин яратмишунрин кIвали (РДНТ), Милли музейди, республикадин учебно-методический центради тешкилай и мярекатдиз муниципальный тешкилатра Россиядин халкьарин адетдин культурадин центрайрин директорар, районрин культурадин управленийрин начальникар, республикадин бязи министерствойрин векилар атанвай.
Иштиракчияр Дагъустандин культурадин министр Зарема Бутаевадин заместитель, РДНТ-дин директор Марита Мугадовади къаршиламишна ва кьетIен тарих авай дараматда кIвалах башламишунай музейдин коллектив тебрикна. Министрдин заместителди районра Россиядин халкьарин адетдин культурадин центрайрин кIвалах тартибда твадай советар тешкилунин, хуьрера центраяр ахъаюнин кIвалах башламишун лазим тирди къейдна.
Марита Мугадова центраяр къанунрив кьадайвал ахъаюнин месэладални акъвазна. Месела, абур федеральный программайрик кутаз хьун патал ихтиярар къалурзавай вири шагьадатнамаяр, устав туькIуьрун, дараматдихъ “зелёнка” хьун чарасуз я.
— Чна республикадин агьалийрин, сифте нубатда, жегьилрин эдебдин, марифатдин гьакъиндай жаваб гузва. Ватанпересвилелди кIвалахун сифте чкадал эцигун герек я.
Семинар-совещанидал музейрин, центрайрин фондарин учёт тухуниз, экспонатар хуьнин кар алай къайдайриз, центрайри тешкилзавай выставкайриз, акъудзавай ктаб-журналриз, гузвай хабарриз талукь месэлайриз иллаки гзаф фикир гана. И месэлайрай П.Гьамзатовадин тIварунихъ галай Дагъустандин ИЗО-дин музейдин директор Салигьат Гьамзатова, Милли музейдин директордин заместитель Заира Кильдеева рахана. КIватI хьанвайбурун вилик музейрин къуллугъчияр тир Елена Мамаевади, Анна Алиева-Самарскаяди, Марьям Сайгитовади ва масабуру чпин фикирар лагьана.
РДНТ-дин векилри центрайрин сайтар арадал гъуниз талукь яз ихтилат кудна.
Республикадин туризмдин ва халкьдин художественный сенятрин министерстводихъ галаз икьрар хьайивал, Россиядин халкьарин адетдин культурадин центрайри абурухъ галаз сих алакъа хуьда.
Республикадин учебно-методический центрадин регьбер Калимат Эльдаровади эхирдай къейдайвал, ихьтин мярекатар мукьвал-мукьвал тухунихъ еке метлеб жеда.
