4-июлдиз Кьурагь райондиз, кьиле РФ-дин Госдумадин, депутат Маграмов Абдулмажид аваз. РД-дин Халкьдин Собранидин депутатар Тимур Гусаев, Фикрет Ражабов, Дагъустан Республикадин  профсоюзрин векил Абдурагьман Адамов, “Сад тир Россия” партиядин региональный отделенидин исполкомдин председателдин заместитель Мегьамедгьажи Юнусов, Госдумадин депутатдин куьмекчи Пакизат Наметова ва масабур  атанвай. Абур “Кьурагь район” муниципальный тешкилатдин кьил Замир Азизова къаршиламишна.

Сифте нубатда делегация райондин больницадиз фена. Ана азарлуяр сагъар хъувунин кIвалахдихъ галаз таниш хьана­. Гуьгъуьнлай “Кьурагь район” муниципальный тешкилатдин кьилин кабинетда райондин агьалийрихъ галаз гуьруьшмиш хьана.

Рекьерин участокдин начальник Лазир Агъабалаева алатай гьафтеда къвайи селди рекьер чIурнавайдакай, ихьтин гьалар  мукьвал-мукьвал жезвайдакай, абур дуь­зар­ хъийидай техника авачирдакай лагьа­на­ ва техникадин патахъай куьмек гун тIа­лаб­на.

“Сельсовет Курахский” муниципальный тешкилатдин кьил Сейфудин Къурбанова хъвадай цин линия къайдадикай хкатнавайди, райцентрадал алайбуруз хъвадай яд амачирди къейдна, Кьурагьрин хуьруьн жемят хъвадай целди таъминарун патал гьазурнавай проект кьилиз акъудуниз  90 миллиондилай виниз пулдин такьатар кIанзавайди лагьана.

Гелхенрин юкьван школадин директор Хидирляс Хидирлясова хуьре эцигзавай школадин дараматдал 90 процентдин кIва­лахар авунвайди, алай  йисуз пулдин та­кьа­тар чара тавурди къейдна ва пулдин та­кьатар бюджетдик кутун хъувунин пата­хъай­ Госдумадин депутатдив тIалабунин чар вугана.

“Сельсовет Шимихюрский” муниципальный тешкилатдин кьил Хийирбег Гьасретова  кIамарал  кьве муьгъ эцигун чарасуз тирди къейдна, Кьурагьрилай винидихъ галай хуьрериз зирзибил кIватIдай машин къачудай пулдин такьатар ахъаюн тIа­лабна.

“Сельсовет Кочхюрский” муниципальный тешкилатдин кьил  Аскер Жабраилова Бугъдатепедин хуьр хъуьтIуьн къишлахрин чилел алайди, и кар себеб яз и чилел хуьруьн поселенидин ихтиярда авачирвиляй, кIвалер эцигиз, чилер госрегистрация ийиз тежезвайди, райондин аранда авай муькуь поселенийрин чилер муниципалитетрин ихтиярриз вахканвайди къейдна, и важиблу месэла гьялиз куьмек гун тIа­лаб­на. Хуьруьз къвезвай рекьиз къир цунин ва муьгъ ремонт авунин патахъай хуьруьн агьалийри кхьенвай тIалабунин чар Госдумадин депутатдив вугана.

Мугьманри къарагъарнавай месэлаяр гьялун патал чпивай жедай куьмекар гудайди малумарна.

З.Азизова меркездай атай мугь­ман­­­риз сагърай лагьана.