Са тIимил вахт идалай вилик Туьркиядин Самсун шегьердай чав шад хабар агакьна: вичин ери-бине Сулейман-Стальский райондин Агъа СтIалдилай тир Руслан Аскерова Сурдлимпиададин (япарал залан тир спортсменрин Олимпиада) гатун XXIII къугъунра дзюдодай 66 кг-дин заланвал авай спортсменрин арада чемпионвилин тIвар къазанмишна. Зун ягъалмиш туштIа, Руслан Аскеров чи халкьдин векилрикай и дережадин, 4 йисалай са сеферда кьиле тухузвай, Олимпиададин къугъунриз барабар тир спортдин важиблу акъажунра иштиракай ва гъалибвал къазанмишнавай сад лагьай спортсмен я. Аферин! Чна адаз спортдин рекье къазанмишнавай виридалайни виниз тир дережадин шабагь рикIин сидкьидай тебрикзава, уьмуьрдин гьар са кам бахтлуди хьун алхишзава. Чи кьегьалди къазанмишнавай агалкьундик адан тренерар тир международный классдин мастер, пешекаррин арада дзюдодай дуьньядин чемпион (2006-йис, Франция) Тельман Къурбанован ва Шамил Алиеван лайихлу пайни квайдал шак алач.
Къейд авун лазим я хьи, чи ватандашдилай гъейри, Самсун шегьерда кьиле фейи акъажунра Дагъустандай тир спортсменрикай мадни кьуда медалар къазанмишна: азаддаказ кьуршахар кьунай Аскар Аскаров — къизилдин, дзюдоистар тир Инна Танашева (52 кг), Къурбан Муртазалиев (90 кг), Мурад Мегьамедилаев (66 кг) ва тхэквондист Шамил Исакьов гимишдин медалриз лайихлу хьана. РикIел хкин: идалай вилик кьиле фейи Сурдлимпиадада дагъустанви спортсменривай анжах кьве медаль къазанмишиз алакьнай. ИкI, Сурдлимпиададин къугъунра Россиядин хкянавай командади вири санлай 199 медаль къазанмишна (абурукай 85 медаль къизилдинбур я), общекомандный зачётда РФ-дин хкянавай команда 1-чкадиз лайихлу хьана. Уьлкведин тIвар гьуьндуьр дережадиз хкажуник Дагъустандин кьегьалри чпин лайихлу пай кутунал чна мадни шадвалзава.
Туьркияда кьиле фейи къугъунрин гъалибчийралди вири дагъустанвийри дамахзавайди Махачкъаладин аэропортуник кьегьалар къаршиламишиз атанвай ксари: республикадин физический культурадин ва спортдин министерстводин векилри, общественный ва политический деятелри, тIвар-ван авай спортсменри, гъалибчийрин багърийрини ярар-дустари иллаки ачухдаказ къейдзавай. Сулейман-Стальский райондин регьбер Нариман Абдулмуталибов кьиле аваз атанвай делегация, зи фикирдалди, районрай атанвайбурукай виридалайни чIехиди тир. И кардини чи ватандашдин агалкьундал чи халкьдин векилри лап рикIивай дамахзавайди къалурзавайдал шак алач. Инал вич-вичелай арадал атай митингдал рахай РД-дин физический культурадин ва спортдин министрдин заместитель Зайнал Салаутдинова спортсменриз къазанмишнавай агалкьунар тебрикна, абурухъ чандин сагъвал ва спортдин майданра мадни гъалибвилер къазанмишдай къуватар хьун алхишна. Чемпиондин тIварцIихъ чими келимаяр Сулейман-Стальский райондин Кьил Нариман Абдулмуталибова, машгьур спортсмен Мансур Исаева, Махачкъала шегьердин спортдин, туризмдин ва жегьилрин крарин рекьяй Комитетдин председатель Марат Ибрагьимова, Р.Аскерован тренер Тельман Къурбанова ва адан буба Максим Аскеровани лагьана.
— Сурдлимпиадада гъалибвал къазанмишун Олимпиададин къугъунрин гъалибвилиз барабар я. Спортда куьне къазанмишзавай гьар са агалкьун — им сифте нубатда куьне куь винел гьар юкъуз зегьмет чIугунин, тренировкайра гьар юкъуз куьне кьиле тухвай кIвалахдин нетижа я. Гьаниз килигна куьне къазанмишзавай агалкьундин тIямни рикIелай тефидайди я, — лагьана Мансур Исаева.
Шадвилин митингдал Нариман Шамсудиновични рахана, Р.Аскероваз ада бапIах, япунжи ва гапур пишкешна.
-Чна чи Ватан вири дуьньядин кесерлу майданра машгьурзавай чи спортсменрал ва абурун агалкьунрал дамахзава. Руслан Аскерован гъалибвили чун спортдин рекье, дугъриданни, кьакьан кукIушриз хкаж хьанвайди субутзава. Чун умудлу я, адан тIвар мад ва мад сеферра спортдин алемда ван къведа, ам мад ва мад сеферра пьедесталдин виниз тир кIарцIел хкаж жеда, — къейдна ада.
Са шумуд югъ идалай вилик чна Руслан Аскерован тренер Тельман Къурбановахъ галаз суьгьбетна.
— Руслан 3-классда кIелзавай аял тир чIавуз зи гъилик дзюдодай сифте яз вердишвилер къачуз атанай. Анлай инихъ тамам 15 йис алатнава. И йисара ада спортдин и жуьредай 5 сеферда Россиядин, Дагъустандин чемпионвилин тIварар, 2012-йисуз дуьньядин чемпионатда буьруьнждин медаль, Россиядин кубок патал акъажунра гъалибвилер къазанмишна, — рикIел хкана тренерди. — Спортда зегьмет чIугунихъ еке метлеб ава, гьикI хьи ви агалкьунар вуна чIугвазвай зегьметдин нетижа я. Руслан лагьайтIа, гьа сифте йикъарилай спортзалда еке зегьмет чIугваз алахъай жегьилрин жергеда ава. Чна адак кутунвай умудар жегьилди кьилизни акъудна. Баркалла ахьтин кьегьалриз!
Чаз, накь, газет чапдиз вахкудайла малум хьайивал, Сурдлимпиадада къазанмишнавай агалкьундай Тельман Къурбанов Россиядин лайихлу тренервилин, Руслан Аскеров спортдин лайихлу мастервилин тIварар гун патал къалурнава.
Рагнеда Рамалданова
