Алатай гьафтеда Дербент райондин администрацияда муниципалитетди алай йисан 10 вацра  авур кlвалахдин нетижаяр кьуниз талукь совещание хьана. Анал районда налогар кlватlзавай гьалдиз, “Гьукуматдин ЖКХ-дин информационный система” Федеральный закон кьилиз акъудуниз талукь месэлайриз килигна.

Адан кlвалахда Дербент райондин кьил М.Желилова, шегьердин ва райондин прокурор Сабир Къазиагьмедова, майишатрин карханайрин руководителри, школайрин директорри ва общественный тешкилатрин векилри иштиракна.

Мегьамед Желилова районда хуьруьн майишат йигиндаказ вилик физвайдикай, гьа са вахтунда райондин хуьрерай налогар кlватlунин кlвалахдик тади кутун лазим тирдакай лагьана.

Дербент райондин кьилин заместитель Сеидмегьамед  Бабаева хуьруьн майишатдин карханайри бегьер кlватlна куьтягьнавайди ва ина хъсан нетижаярни хьанвайди къейдна.

— Къенин йикъалди, чна 53 агъзур тонн ципицIар, 450 агъзур тонн салан майваяр кlватlнава,- лагьана ада. — Санлай къачурла, чна 9 миллиард манатдин продукция гьасилнава. Заз хуьруьн майишатдин вири зегьметчийриз баркалла лугьуз кlанзава. Абурун гьакъисагъ зегьметди виниз тир нетижаяр арадал гъанва. 10 вацран вахтунда райондин сад авунвай бюджетдиз 179 миллионни 870 агъзур манат  налогар яз атанва.  Санлай къачурла, вилик эцигнавай план  артухни алаз тамамарнава. Райондин администрациядин  кьилин заместитель Анвер Гьажимурадова хуьрерин  кьилер Гьукуматдин ЖКХ-дин информационный системадихъ галаз кlвалахунин патахъай тагькимарна.

Къагьриман Ибрагьимов