Алатай гьафтеда Дербент шегьердин кьил Малик Баглиева, федеральный “Шегьерра къулай шартlар арадал гъун” программадин сергьятра аваз, СССР-дин Игит Абас Исрафилован тlварунихъ галай паркуна, М.Агъасиеван проспектда авай са жерге гьаятра эцигунрин кIвалахар кьиле физвай гьал ахтармишна.
А.Исрафилован парк гуьрчегдиз, къулайдиз туькlуьрунин кlвалахар эхирдив агакьзава: ина тротуардин плитка михьиз дегишарнава, “Афгъанви аскеррин” мемориальный комплекс цlийи хъувунва, аялар ва спортдал машгъул жедайбур патал майданар туькlуьрнава, газонар къайдадиз гъизва, эквер кутуниз гьазурвал аквазва.
М.Баглиева эцигунарзавай устlарриз, ЖКХ-дин къуллугъчийриз са жерге кимивилерни къалурна. Санлай къачурла, шегьердин кьил кlвалах кьиле физвай гьалдилай рази хьана. Ада шегьердин администрациядин кьилин заместитель Сергей Ягудаеваз ва ЖКХ-дин управленидин начальник Салигь Рамазановаз кимивилер са куьруь вахтунда арадай акъудун тапшурмишна.
Анлай абур М.Агъасиеван проспектда авай кIвалерин гьаятриз фена ва агьалийрихъ галаз суьгьбетар тухвана. И гьаятрин рекьера къир цанва, машинриз акъваздай чкаяр туькlуьрнава, шегьерэгьлийри чпин азад вахт къулай шартlара тухун патал ина беседкаяр ва куьсрияр эигнава. Агьалийри, тамамарнавай вири кlвалахрилай разивал къалурна.
ЖКХ-дин управленидин начальникдин заместитель Шамил Рашидова эцигунрин кlвалахар мукьвара куьтягьдайдакай, къведай йисуз Дербентда мадни са шумуд гьаятда къулай шартlар тешкилунин кlвалах федеральный бюджетдик кутунвайдакай, идалайни гъейри, и кlвалахриз шегьердин бюджетдайни пул ахъаюн пландик квайдакай лагьана.
Рикlел хкин, федеральный “Шегьерра къулай шартlар арадал гъун” программа 2022-йисалди кардик жеда ва и вахтунда къадим Дербентдин маса паркарани микрорайонра галай-галайвал къулай шартlар арадал гъида.
«Лезги Газет»
