Алай йисан выставкайрин календардин эхиримжи мярекат — республикадин агьалийрин иллаки рикI алай “Россиядин къизил — “Къашарин алем” выставка 21-24-декабрдиз Махачкъаладин Р.Гьамзатован тIварунихъ галай Милли библиотекадин дараматда 15-сеферда кьиле фида. Кьуд йикъан вахтунда Дагъустандин меркез Кеферпатан Кавказдин заргарвилин центрдиз элкъведайвал я.
Идакай выставкадин тешкилатчи, республикадин “Дагъустан-ЭКСПО” ВМЦ-дин директор Мегьамед Саругъланова журналистрихъ галаз хьайи гуьруьшдал хабар гана. Пресс-конференцияда гьакIни РД-дин алишверишдинни промышленный палатадин (ТПП) вице-президент Александр Шевченкоди, РД-дин туризмдин ва халкьдин художественный сеняткарвилерин рекьяй министерстводин управленидин начальникдин заместитель Нариман Рамазанова иштиракна.
ЦIийи йис алукьиз мукьва жезвай йикъара дагъустанвийриз чпин багърийриз гуьзел пишкешар ужуз къиметрай къачудай мумкинвал гун патал, республикадин выставкада Россиядин тIвар-ван авай карханайри жуьреба-жуьре, гьатта чпиз тешпигь авачир хьтин безекар гваз иштиракда. Выставка Махачкъаладин Р.Гьамзатован тIварунихъ галай Милли библиотекадин дараматда кьиле фида.
М.Саругъланован гафаралди, адет хьанвайвал, алай йисузни выставкадал агьалийривай багьа ва юкьван багьавилин къашар, кIвал безетмишун патал гьазурнавай гуьрчег къаб-къажах, заргарвилин производство патал тадаракар, алатар, сятер, чпиз тешпигь авачир пишкешар, къадим девиррилай амай затIар, заргарвилин шейэр твадай гуьрчег къапар, халкьдин сеняткарвилин, кагьрабадикай туькIуьрнавай безекар ва са жерге маса шейэр маса къачуз жеда.
Дагъустандин меркезда чпин экспозицияр заргарвилин алемда тIвар-ван авай зурба карханайри: “Альфа”, “Жиразоль”, “Бриллианты Юга”, “Московский ювелирный завод “Электрум”, “Русское золото-арт”, “Аквамарин”, “Адамас”, “Алмаз-Холдинг”, “Драгоценности Якутии”, “Академия”, “Москвадин бриллиантар”, “Кустов и Партнеры” ва са жерге маса компанийри ачухда.
М.Саругъланова къейд авурвал, кьиле тухузвай выставкадин асул макьсад Кеферпатан Кавказдин республикайрин заргарвилин карханайрин, Россиядин Кьиблепатан, Москвадин, Санкт-Петербургдин, Костромадин, Якутиядин, Уралдин ва са жерге маса регионрин компанийриз амадагвилин алакъаяр тайинариз куьмек гун, карханайри акъудзавай продукция цIийи регионра муьштерийрин вилик майдандиз акъудун ва икI мад.
Нариман Рамазанова “Россиядин къизил” выставкада лайихлу чка Дагъустандин заргаррин гъиликай хкатнавай шейэрини кьадайдакай лагьана. ИкI, ина Къубачидин къизилар, Унцукулдин кIарасдикайни ракьукай раснавай шейэр, Балхардин устадри гьазурнавай чепедин къапар, Кьиблепатан Дагъустандай тир гамар, халичаяр ва са жерге маса шейэр ужуз къиметрай маса къачуз жеда.
Александр Шевченкоди лагьайвал, “Дагъустан-ЭКСПО” ВМЦ-диз идаради гьамиша куьмек гузвайди я. “Выставка гьазурдайла чун гьамиша маса регионрин ТПП-рин амадагрихъ галаз алакъалу жезва, абурун тIварцIел выставкада иштиракунин теклифар рекье твазва. Идалайни гъейри, чун республикадин выставкадиз жуьреба-жуьре регионрай жезмай кьван гзаф иштиракчияр желб ийиз алахъзава. Гьикьан гзаф компанияр иниз атайтIа, гьакьван гзаф ва гьар жуьре къизилдин безекар, къашар, гуьзел шейэр маса къачудай мумкинвал жеда чи республикадин агьалийриз”, — малумарна ада.
Адет хьанвайвал, “Россиядин къизил” выставкадин сергьятра аваз “Къашарин алемдизни” сейр ийиз жезва.
Ина гьакIни маса къачунвай шейинин ери (проба) ахтармишдай мумкинвал ава. И кар патал ам кьиле физвай вири йикъара ина республикадин Прикаспийский государственный пробирный надзордин инспекциядин пешекарар, гьакIни геммолог (багьа къашар ахтармишдай пешекар) жеда.
Выставкадин тешкилатчийри республикадин агьалийриз и мярекатда активнидаказ иштиракуниз эвер гузва.
Жасмина Саидова
