7-июндиз «Лезги газетдин» кьилин редактор Мегьамед Ибрагьимов ва адан заместитель, «Къурушрин сес» газетдин кьилин редактор Муса Агьмедов Сулейман-Стальский райондин кьил Нариман Абдулмуталибовахъ ва чкадин прессадин векилрихъ галаз гуьруьш хьана. Мярекатда гьакIни Сулейман-Стальский райондин информациядин агентстводин начальник Жабраил Асланова, «Куьредин хабарар» газетдин кьилин редактор Асият Мирзалиевади, Кьасумхуьруьн телевиденидин регьбер Агьмед Гьуьсейнова, райондин газетдин мухбирри, администрациядин пресс-къуллугъдин векилри, «Лезги газетдин» Сулейман-Стальский районда авай штатдик квачир мухбирри иштиракна.
Гуьруьшдин сергьятра аваз Нариман Абдулмуталибова алай вахтунда Сулейман-Стальский райондин печатдин ва электронный СМИ-яр авай гьалдикай лагьана, «Лезги газетдин» дережа мадни хкажун патал вичихъ авай фикирар раижна.
«Милли прессади руьгьдин ивирар, меденият, эдебият машгьур авунин жигьетдай йигинвал къалурун лазим я. КIелзавайбурун фикир цIийи, итижлу рубрикайрал желбна кIанда. Алай аямди милли чIаларал акъатзавай газетрихъ электронный версияр хьун тIалабзава. Чи йикъарин жегьилри цIийи технологийрикай (телефон, планшет, ноутбук, компьютер…) гегьеншдиз менфят къачузва. Абуру хабарар газетрилай гзаф интернетдай кIелзава. Гьавиляй сайтра хайи чIалал таза хабарар гун, газетдиз акъатнавай макъалаярни сайтра эхцигун чарасуз шартI я», — къейдна Нариман Абдулмуталибова.
Мегьамед Ибрагьимова Сулейман-Стальский райондин руководстводиз лезги чIал, меденият, халкьдин адетар хуьнин ва еримлу авунин карда лайихлувилер къалурунай сагърай лагьана ва район «Лезги газет» подписка авунал гьалтайла кIвенкIвечи чкадал алайдакай хабарна. Ада райондай «Лезги газетдихъ» галаз алакъаяр хуьзвай авторрин алакьунарни къейдна ва Хазран Кьасумован макъалаяр тариф авуниз лайихлу, ам хъсан хатI авай, чранвай мухбир тирдакай лагьана.
«Чаз «Лезги газетдин» къамат хъсан патахъ дегишариз, ам халкьдиз генани мукьва ийиз кIанзава. Чахъ газетда милли чIалахъ, тарихдихъ, медениятдихъ, Лезгистандихъ хуьрерихъ галаз алакъалу цIийи рубрикаяр – «Лезги хуьрер» тIвар алай шикилрин, «Лезгивал гьикI хуьда?», Лезгистандин багълариз, мулкариз талукь ва маса рубрикаяр кардик кутадай ниятар ава. И мурадар кьилиз акъудунин карда чна милли ивиррихъ рикI кузвай виридаз эвер гузва. «Лезги газетдин» ракIар гьар са ватанэгьилидиз ачух я», — лагьана Мегьамед Ибрагьимова.
Гуьруьшдин сергьятра аваз райондин кьил Нариман Абдулмуталибова 2017-йисан 2-пай патал «Лезги газет» подпискадиз кьетIен фикир гудайди къейдна ва «Лезги газетдин» редакциядин коллективдихъ мадни еке агалкьунар хьун алхишна.
[KGVID]https://lezgigazet.ru/wp-content/uploads/2017/06/Lezgi-gazet-gar-sa-kIvale.mp4[/KGVID]
P.S.
2017-йисан 1-пай патал Сулейман-Стальский районда «Лезги газет» 2047 касди кхьенва.
«Лезги газет»
