Уьмуьрдин гелер
На заз цавай рагъ багъишнай,
Ганай на заз экуь бахтар.
Такабурлу я вин суьрет,
Багьа я заз ви ширин тIвар.
Ви гъилевай лацу дафтар,
Кхьенвай заз ширин гафар,
Хважамжамдин рангар алай,
Къизилгуьлдин цуьквер гудай.
Масан я заз а ви гафар,
Гафар кхьей гьа ви тупIар,
Гьар вун рикIел гъайи чIавуз,
Зи вилерай къведа накъвар.
На уьмуьрдин гимидаваз,
Тухванай зун дуьнья къалаз,
Гьуьлуьн кьулай цIар авуна,
Куьз фена вун завай яргъаз?
Вуна заз ви лувар тунва,
Мергьяматлу крар тунва
Гьар баладин, гьар неведин,
Вилера ви нурар тунва…
Руьгьдин гьарай
Уьмуьр хъел хьанва завди, адавай
Вахкуз жезвач зав къачурди завай.
Са ванни тежер серт чилин хура,
Инсафсуздаказ туна вун сура.
Хквен тийидай йикъарикай экуь,
Лугьузва за чIал — ваз ван
къвезвач хьи.
Вахъ галаз пайнай за гъамни лезет…
Куьмек це, Аллагь, кьезилра зи дерт.
Алатнавач зи рикIелай ви хъвер,
Ви вилерни заз килигдай тегьер.
РикIелай фенвач а ви гъилин кап,
Зи гъил кьаз хьайи, кIанидаказ лап.
Алатна фена зи бахтлу йикъар,
Бушлух я кьуд пад, авачиз кьадар.
Цавун цифера вил твазва за мад,
Ахквада лугьуз садра ви къамат.
Заз, къужахна, ваз кинариз я кIан,
Вун акун патал гуз гьазур я чан.
Чун къакъат тийиз, сад тир чи къастар,
Вал садра за чан хкида, зи яр!
Къизилгуьлдилай къе-пака зулу,
Пиришар тухуз, ийида зулум.
А цуьк вуна заз ганай, ам харуз
Хвенай за рикIив, вахтунда яд гуз.
На зи рикIелай алуда гъамар,
За тупIалайда алатай вахтар.
Хъчирзава яд за къвез ви сурал,
Къизилгуьлдал хьиз, чан хкиз кIанз вал.
Чахъ вуч хьанва?
Зи вилериз терс килигна тIурфанди,
Зи муьгьуьббат яна хьи цIайлапанди.
Элкъвена зав гъам-хажалат, луж хьана,
Жуван чIалахъ жезвач зун: захъ вуч хьана?
Гьинава заз хъуьрез хьайи вилер ви?
Гьинава зак кягъиз хьайи гъилер ви?
ЧIулав яйлух алчуд хьана кьилел зи,
Ни лугьуда, вуч хьанва захъ чилел и?
Килигиз зун шикилрай ви вилериз,
Ван хквезмач заз ви гафар, туьмериз.
Къужахда кьаз, хтулрик руьгь кутазмач,
Вуч хьанва вахъ, вучиз вун зав рахазмач?
Къе зи вилик ви къамат ква мармардин,
Къизилдалди кхьенвай тIвар ви зардин.
Зи рикI ханва, белки, кIус-кIус хьанватIа,
Гила заз чир хьанва вахъ вуч хьанватIа…
Автор – Инжилат Агьмедова
Таржумаяр — А.Къардашан
