Гьуьрметлу ватанэгьлияр! Ингье 2017-йисан сифтегьан пай акваз-такваз акъатзава. Гьар жуьредин къайгъуйрихъ галаз санал амай ругуд варз патал чи багъри “Лезги газетни” (эгер ам йисанди кхьенвачтIа) кхьин хъийидай вахт атанва. ГьакI хьайила, редакциядин коллективдихъ галаз санал жергедин лезги тир зани квез, иг­ра­ми дустар, газет кхьиниз жуван шиирдалди эвер гузва. Къуй чи рикI алай милли газетдин дережа мадни кьакьан, адан тиражни артух хьурай!

 

Атанва мад кхьидай вахт

Милли чIалан газетрин тахт!

Тушни им чун патал са бахт, —

Кхьин чна “Лезги газет”!

 

Гъиле кьуна мягькемдиз пер,

Чина аваз зегьметдин хъвер,

Ник дигизвай кьегьал лежбер, —

Кхьин чна “Лезги газет”!

 

Тийижиз темпелвал, гьилле,

Дезгагьдаллаз фикир, вилер,

Ракьунал чан гъизвай фяле, —

Кхьин чна “Лезги газет”!

 

Несилриз чирзавай илим,

Гьа и рекье хьанвай лигим,

Гьар муаллим, гьакIни алим, —

Кхьин чна “Лезги газет”!

Нариман Къарибов, Дербент шегьер